Zoram Chhanchhuah hnatlang nei

Congress party chu Ningani khan MNF sawrkar duh lohna leh Zoram Chhanchhuahna poster tarin an hnatlang a. Aizawl bakah district hrang hrang leh assembly constituency hrang hrangah a ruala tar a ni.
Poster tar hnatlang puala vantlang inkhawmah MPCC vice president Lal Thanzara chuan MNF sawrkarin SEDP cheng nuai 3 semin chak takin sawrkar a kalpui an lo beisei laiin, kum 4 hnu a thil awmdan chu a beidawn thlak takzet tih a sawi.
Lengpui Airport-ah sum tam tak a awm tih an hriat avangin an duh ang tawka an suasam theih nan MNF sawrkar hnu lawkah Aviation-a officer fel tak chu petchhuakin, chief minister-in duh duha sum a zen pui theih tur principal consultant an indah a. Airport hnathawktu turte pawh a nghet lo hlira dah an ni, tiin, “CM-in Airport cheithat hna a tlawh tlut tlut a, chuta hna thawk tura a thlan chu contractor Kamrul Chhangte leh a (CM) tupa an ni. Airport suasamin an duhtawkin hma an la a, an hmanraw hman a tha lo hle a, bungrua an tichhe nasa hle bawk. Airport an suasam dan hi Airport enkawltu officer-te leh thawktu tam tak rilru pawh a na a ni,” a ti.
Healthcare-ah mi harsate inenkawlna turin cheng nuai 2 thleng SEDP atangin dah a ni tih CM-in puang mah se, healthcare bill pek theih loh vaibelchhe 65.9 a awm leh si tih Lal Thanzara hian sawiin, “SEDP Healthcare cheng nuai 2 an dah chu khawiah nge tih ka zawt a ni,” a ti.
Sum enkawl kawngah MNF sawrkar a hlawhchham tih a sawi a. Mizoram sawrkarin leiba a ngah a, puk tur a zawng reng bawk tih a sawi. “Chutiang dinhmuna kan din avang chuan Zoram chhanchhuahna poster tar hnatlang kan nei a, Zoram chhanchhuah hna hi kan la thawk dawn chauh a ni,” MPCC hruaitu hian a ti.
Min enchhin rawh u, titu ZPM chu party tinin an lo enchhin tawh, party hrang hranga awm tawh kalkhawm, vote hmu sang ngai miah lote an ni, tiin, “Enchhin kan duh hrim hrim a nih chuan ‘kan ti ang’ tih chu ti mai thin Congress party kan awm e,” MPCC vice president hian a ti. Kum 10 an sawrkar chhung khan mipui tih lungawilohna tam tak an nei tih an hriat rualin, an danglam tawh a; Pu Lalsawta hoin sawrkar tha siam an tum tak tak tih a sawi a ni.