Ather Pro Volleyball League 2024 Hnehna nena bul tan Hunthar

Huntharin chungnung takin nikum final-a an tlawmna an chhang let a, Ather Pro Volleyball Leaague inkhel hmasa berah 3-0-in champion lai Thutak Nunpuitu Team an hneh.
Thawhlehni zanah LPS Arena, Falkland-ah a khatin mipui an pung khawm nghal a, Huntharin team thar dinin Anurag Rawat chuan hmun pawimawh a luah a, kawng hrang hrangah inkhel thunun tluanin 25-21, 25-22, 25-21-in an chak.
Kuriz Player of the Match Anurag chuan point 22 hmuin vawi 13 a tisual a, a elpui leh TNT innghahna pawimawh Vanlaltanchhana’n point 17 thawh chhuakin 11 a hloh a ni.
Kum 2023 final-ah Huntharin vawi thum nan champion hmasa ber ni thei turin set hnih set khatin hma an hruai hman. Set linaah vawi hnih deuce-in TNT an tlang a, a tawpah 25-17, 20-25, 20-25, 27-25, 15-12-in a tum khat nan an champion zui a, Pro Volleyball mipa inelnaah Mizo hlanga trophy la hmasa ber an ni nghal bawk.
Tun tum Pro Volleyball-ah Huntharin team an siksawi nasa a, captain Remsangzuala leh Lalnunfela tih loh Mizo player hriat hlawhte an chhuak a, Fabian Lallunghnema la lutin player naupang zawk tan hmun an siamsak.
State dang atangin nikuma Tuipuiral tan langsar taka khel tawh Delhi spiker Anurag bakah Kerala atangin, kum 22 mi Ashok Bisnoi an lalut a; TNT hmaah Bisnoi tel lo mah se team hriam leh nung zawk an ni tih lantir.
Coach VL Malsawma Renthlei chuan season liam taa an hun tawn lungchhiatthlak tak siam that an duh a, champion ngei tumin team an din bakah inbuatsaihna an neih that avangin an inringtawk tih a sawi lawk.
Kum 2023 champion TNT team kha Mizoram volleyball chanchina hriat zui tur leh boruak nei lian an ni a, coach Lalhmangaihsanga Sailo chuan player neih belh leh hloh nei lovin khelmual luhpui mah se kum 2019 champion Chhinga Veng Spikers leh 2022 champion Durtlang North hnung zuiin champion lai ni chhunga Pro Volleyball an khelh hmasak berah chiang takin an tlawm.
Kum 2019 khan Huntharin champion lai ni chunga league bul an tannaah 3-2-in TNT an hneh a, hemi hnu hian vawi thum a zawnin league-a an inlan hmasak berah champion lai an tlawm. 2022-ah Durtlang North-in 3-2-in Chhinga Veng an hneh a, 2023 league inkhel hmasa berah TNT-in 3-0-in Durtlang North an hneh.
Hunthar tan Pro Volleyball-a tawn hriat nei tawh Anurag chuan nuam ti takin a khel nghal a, hlap tla zawnin set khatnaah 22-17-in hma an hruai. Tum hnih a vuak kai loh zawn hnuah 21-24-in TNT-in hnaih ve leh mah se harsatna awm lovin an tlang.
Set hnihna tir lamah champion laiin tan hmun siam remin 8-6-in an sang a, an tawn san lai ber niin an tlo rei lo. Anurag bakah Fabian-a leh mi thar Wilson Lalremruata’n Hunthar tan point 10 ve ve thawk chhuakin derthawng lovin set thum an la zawn a, a umtu zawkah TNT an tang tluan.
A hmain Hmaa’n damlohnain player a tihbuai avangin TNT-in kim thlapa inpuahchahna hun an nei tam lo tih a sawi. Valbuanga thlawptu Dinchhunga leh Zosangzuala’n point ruk ve ve hlawhin tute mahin season liam taa an khelh dan an pha lo va, team pum puiin hmasawn an mamawh tih chiang takin a lang.
April 30-ah insiam that tumin TNT an inlan leh dawn a, tun dinhmuna player nei tha Tuichangral nen an intawng ang. Huntharin hmabak pawimawh an hlen hnuah rin an hlawh nghal a, May 2-ah Chhinga Veng nen an inkhel dawn a ni.