Bial inkhawmpui a tiak

April 26-28 chhung khan Mizoram Presbyterian Kohhran bial hrang hrangah Bial Inkhawmpui neih a ni.
Zirtawpni zan khan Palai Lawmna & Report Inkhawm neih a ni a, Inrinni nilengin rorel a ni. Inrinni zan atangin vantlang Pathian biak inkhawm neih a ni a, Pathianni chawhma, chawhnu leh zanah neih chhunzawmin, chawhnu inkhawmah Lalpa Zanriah Sakramen theh a ni a, zan inkhawmah Bial chairman kalchhuak turin valedictory sermon an sawi a ni. Pathian biak inkhawm hun hrang hrangah thupui sawi tura ruatten thuchah an sawi.
Inkhawmpui hman dan tur leh programme kimchang hi Bial Nomination Committee-in an ngaihtuah thin a. Bial Inkhawmpui hi April thla Pathianni vawi 4-naah neih thin a nih rualin, engemaw rokhawlhna avanga hmang hma hret leh hmang tlai hret an awm thin.
Bial inkhawmpuiah hian bial chhunga hma lak dan tur rel a nih bakah Presbytery-a ngaihtuah atana thlen leh turte rel thin a ni.
Nikum lam report-a a lan danin tun dinhmunah Pastor bial 298 awmin kohhran 1139 a awm mek. Mizoram Presbyterian Kohhran hnuaiah hian kohhran member 628719 an awm a, an zinga 304304 chu mipa niin, 324415 hmeichhia an a ni.