SC-in RRF huamchinah hma la rih lo turin sawrkar leh NHIDCL hriattir

Supreme Court chuan Mizoram sawrkar leh National Highways & Infrastructure Development Corporation Limited (NHIDCL) hnenah Riverine Reserved Forest leh Road Side Reserved Forest of Mizoram huamchinah dan ang thlapa Forest department atanga phalna an hmu a nih loh chuan hemi huamchhungah hmasawnna hna thawk rih lo turin a hriattir.Mizorama kawngpui laih leh a kaihhnawihah forest dan bawhchhiatna nasa tak a awm nia hria in, environmental activist panga – Vanramchhuangi, Chaltlang Dawrkawn; VL Hrima, Mission Veng; Romalsawma, Mission Vengthlang; Dr Lalbiaknawia Ngente, Bungkawn leh Rongura Hrahsel, Mission Vengthlang te chu Supreme Court-ah an zualko a, hemi chungchang hi Supreme Court bench – Justice BR Gavai leh Justive Sandeep Metha thutna chuan ngaihtuahin, kum 2021-a Gauhati High Court-in Riverine Reserved Forest leh Road Side Reserved Forest of Mizoram chungchanga thutlukna a siam Mizoram sawrkarin a bawhzui dan mak an tih thu an sawi.
Supreme Court-a zualkote aiawha ding advocate Gaurav Kumar Bansal chuan, Forest department dan tlawhchhan mumal awm loin Mizoram Environment Forest & Climate Change department chuan RRF leh RSRF huamchhunga hmasawnna hnathawh hi a lo phalsak ringawt tih a sawi a. Hei hian Forest Conservation Act 1980 a kalh a ni mai loa, EF&CC PCCF leh principal secretary hoa thukhawmin RRF huamchin chu forest ni zel tura thutlukna a lo siam tawh chu a kalh tih a sawi.
Hemi chungchang hi kumin July 24-a ngaihtuah leh turin Supreme Court chuan a ti a. Hemi kaihhnawiha sawi duh an neihte chu sawi hman ngei turin Mizoram sawrkar leh NHIDCL chu a hriattir a ni.