Bangladesh atanga lo lutte CADC area-ah kan dah ang – Adviser to CM

Bangladesh atanga Zohnahthlak rawn lutte chu Chakma Autonomous District Council huamchhungah sawrkarin a dah vek dawn tih adviser to chief minister Lalmuanpuia Punte, MLA chuan a sawi.
Thawhtanni khan Zo Re-Unification Organisation (ZORO) chuan an din champha vawi 36-na an lawm a. Heta thu sawitu, ZORO vice president ni bawk Lalmuanpuia Punte chuan ZORO-in independence a sual ngai loa, khawvel hmun hrang hrang – India, Bangladesh leh Myanmar-a awm Zofate kan insuihkhawm a, rorelna pakhat hnuaia kan awm theih nan hma a la mai zawk tih a sawi.
UNO-in indigenous people-te a theihnghilh dawn loa, UNO chu a duhnaah chuan a chak lutuk, a hunah chuan indigenous people-te hi a la khai chhuak ngei ngei dawn tih sawiin, “Zofate tan hian Pathianin thil tum a neisa a, he hnam hi Pathian vohbik kan ni a, Pathianin mal min sawm dawn. Zofate hian Pathian kan au nasa a, kan chhehvel ringlo mite hnenah chanchintha kan hrilh darh chhung chu Pathianin min pui zel dawn. Sawrkarin kan unau Bangladesh atanga rawn kal thar apiangte chu Chakma Autonomous District Council area-a dah vek tawh turin a ti a, hei hi hma lak mek zel a ni,” Lalmuanpuia Punte hian a ti.