Siaha-ah AR leh MJA inkawm

Siaha-a awm 20 Assam Rifles chuan Mizoram Journalists’ Association Siaha member-te chu Inrinni khan anmahni hmunah lengah sawmin an inkawm.
20 AR Company commander Major Raj Kishor chuan sipai lama luh tum thalaite hnenah a thlawnin training an pe thin a. Chumi tur chuan Siaha district-a thalai tam zawk tan an inhawng reng tih a sawi. Siaha district chu international border-a awm a nih angin dan loa thil lakluh dan kawngah theihtawp an chhuah thin a. Ramri venhim chauh an hna a ni loa, ruihhlo lut tur laka venhim hna an thawk nasa tih a sawi a ni.
Infiamna hmanrua chi hrang hrang chu a mamawhtute hnenah an pe chhuak thin tih sawiin, thalai tam tak ruihhlo laka an fihlim theihnan infiamna chawisan leh uar zawka kalpui a tul hle nia a hriat thu a sawi. Thingtlanga chengte tan ‘health camp’ neiin an chhuak thin a, hei hi thingtlang lama chengten an hlawkpui hle tih a sawi a. Zirlaite tanpui an ngaihna kawngah an theih leh phak ang angin an pui thin tih a sawi bawk.
MJA nen thawhhona tha tak awm turin Assam Rifles an inhawng reng tih Major Raj Kishor hian a sawi a. MJA aiawhte pawhin Siaha district tana AR hmalakna leh inpekna fakawm an tih thu sawiin, an district a ralmuan zelna tur leh hmasawnna tha zawk awm tura thawhho zel nise tih an sawi a ni.