Bayern nihrualin a lerah Dortmund chho

Pathianni Bundesliga lamah Borussia Dort-mund chuan 4-1-a Her-tha Berlin sawp chungin hmahruaitu Bayern Munich chu point-ah an nihrual a, kumin bik league-ah a zawnin match ruk zet an chak tluang tling ta.
Dortmund tana lang-sar Karim Adeyemi chuan goal khat a thun bakah assist vawikhat neiin, Germany inter-national Adeyemi hian minute 27-ah Marco Reus assist atanga a backheel flick pui tak hmangin mualneitu team hmahruaina a thun a; minute li hnuah an goal hnihna thawhtu Donyell Malen-a goal tur a chhawpsak zui leh zat.
An goal hnihna tur a siamsak hnu hian a malpui tha a tihnat avangin Adeyemi hi lakchhuah a ni.
Second half an thah fel hlawt tihah mikhual Berlin lamin Lucas Tousart goal hmangin an siphurh pakhat an sut then a, mahse, Dort-mund hian target vawi-nga an fuhah goal li an tilut tling a, Hertha tan point beisei tur a awm zui ta chuang lo.
Dortmund goal thum-na hi minute 76-a Reus-a free kick hrinchhuah niin, last minute-ah Julian Brandt chuan mualneitu team goal lina leh he inkhela goal lut hnu-hnungber ni zui ta a thawh ve leh.
A hma kar lawk Champions League round of 16 first-leg inkhela sikhat faia Chel-sea hneh hlimhlawt Dortmund hi kumin chhunga an league match vawiruk khelh tawhah an la chak fai vek a, point 43 nei chungin goal difference-a an tluk loh hmahruaitu Bayern Munich nen an point hmuh a inzat.
Pathumnaah Schalke nena goalless draw pel zo lo Union Berlin pawhin khelh 21-ah bawk point 43 an hum ve mek.