Atletico chakpuitu Griezmann

An mikhual Athletic Bilbao lakah hun tawp dawna goal pui tak khungin Antoine Griezmann chuan Pathianni zan La Liga inkhel pakhatah sikhat faiin Atletico Madrid a chakpui a, table-ah Madrid club te zawk hian palina dinhmun an sawh-nghet leh sauh.
Season harsa tak hmang mek Atletico tan tun kha an khelmuala vawinga an chakna chiah niin, home-a an tlawm zingah Cham-pions League group stage leh Copa del Rey quarter-final a tel.
Pathianni inkhelah mual-neitu Atletico kha hun tam zawkah team \ha zawk an ni a, a tir lama goal khung thei tur an nih laiin Athletic goalkeeper kum 22 mi Julen Agirrezabala chuan first half-ah pui zet zetin \um hnih an lama goal lut tur a dang a; Diego Simeone-a team-in an chance neih an hloh mawlh mawlh hnu second half minute 73-ah Griezmann chuan goal awmchhun ni zui ta hmangin home team tan point thum an thawkchhuak thei hram a ni.
Mikhual Athletic lam pawh hian goal thun theihna hun remchang siam tumin an nawr ve fo a, Iker Muniain bakah Williams brothers an tih mai Nico leh Inaki chuan chance \ha an siamchhuak thuak thuak a, mahse, Atletico defence inkhairual \ha lutuk an paltlang zo ngang lo a ni.
Griezmann-a goal luhna kawngah khan mimala a sutkuak piahlamah substitute Memphis Depay nena an thawhrah a langsar a; ti hian, French player Griezmann hian Bilbao a hmachhawn tawh \um 30-ah goal 14 a tilut tling a, professional career-ah Bilbao hi team malkhaia goal a khung hnemna ber an ni nghe nghe.
Atletico Madrid hian league khelh 22-a point 41 hum chungin palina an luah a, point hnihin pathumna luahtu Real Sociedad an phah lo.
Real Sociedad hian Inrinni lam khan an khelmualah point hnih an hloh \hen a, sikhat ve ve thunin an mikhual Celta nen an inhnehtawk.
Point 37 nen Real Betis-in pangana an \hut ve bawk.