Mizoramah Environment Day hmang

June 5 kha World Environment Day (WED) a ni a, khawvel puma he ni denchhena hun hman niin, Miozramah pawh hmun hrang hrangah hman a ni.
Aizawlah chuan Mizoram Pollution Control Board huaihawtin hman a ni na. MPCB chairman Liankima Lailung, IFS (Rtd.) chuan kan leilungte uluk lehzual enkawl a ngai a, tui leh boruak thianghlim tam zawk neih theihna tur a nih avangin ngaihtuahna thar pu in, tunah bul kan tan nghal a ngai tih a sawi. “Kan khawvel lo hi mihringte hian chenna tur khawvel dang kan nei lo tih hre tharin, leilung leh tui leh boruak kan enkawl that a pawimawh a ni,” a ti.
Mizoram Environmental NGOs Coordination Committee (MENCO) general secretary Vanlalhrima’n power point presentation hmanga zirtirna a pe a. Khawvela thil awm zawng zawngin awm dan tur fel taka duansa kan nei vek a, chu chu mihring hian hmasawnna kawngah kan tichhe thin a, chuvangin environment chhe zel tur veng hian mimal tinin mawhphurhna kan nei, tiin a sawi a ni.
Mizoram EIACP Hub programme officer Benjamin Lalnunsanga Colney chuan kumin World Environment Day puala MPCB chetvelna a report a. MPCB hian WED pualin zirlaite nen district hrang hrangah mass rally an nei a; Aizawl veng hrang hrangah E-Waste Management Drive neih a ni bawk.