MSPMC-in EMRS sak mek enfiah

Eklavya Model Residential School Bilkhawthlir chu Mizoram State Project Monitoring Committee chuan an vice chairman R Lalrinawma IRS (Rtd) hoin Ningani khan an tlawh a, building hrang hrang sak an endik.
Vice chairman chuan EMRS chu sawrkar laipuiin tribal-te tan a buatsaih a ni a, dinhmun harsa zawka awmten zirna tha an ban phak ve theihna atana ruahman a ni tih a sawi. Naupang 400 tan a thlawna zirna tur school building tha tak sawrkar laipuiin a chhawp chu Bilkhawthlir leh a chhehvel khua tan zirna lama hmasawnna hmanraw tangkai tak a nih ngei a beisei tih a sawi a ni. Mizoramah EMRS sak mek panga a awm bakah sak tura pawm tawh paruk dang a awm a; a tul anga tihchangtlun hna pawh thawh zel a ni dawn tih a sawi bawk.
EMRS Bilkhawthlir hi 2020 kum tir atanga hna tan a ni a. Social Welfare department enkawlna hnuaiah cheng vaibelchhe 240 hmangin JMT Architect-in a thawk. Sak hna an zo thawkhat a, zirna hi tun thla – June atanga kalpui tan tum a ni. Kumin academic session-ah hian class VI leh class VII kalpui tum a ni a, naupang hi class khatah mipa leh hmeichhia 30 zel awm theia ruahman a ni.
EMRS campus Bilkhawthlirah hian mipa leh hmeichhia 200 ve ve lengin a hrangin hostel siam a ni a, school building, dining hall, guest house, chhungkaw 26 chen theihna staff quarters building 11, principal quarters leh power sub station a awm. Tuizem litre nuai khat dawng siam a ni a, basketball court leh volleyball court siam a ni bawk.