Box office-ah ‘Bad Boys 4’ a che tha ber
Hollywood film, Will Smith leh Martin Lawrence te channa, action comedy ‘Bad Boys: Ride or Die’ chu North American box office-ah beisei aiin a che tha a, tun weekend kalta khan North America-ah cinema hall ticket hralhna atangin dollar maktaduai 56 la lutin, North American box office No.1 a ni.
He film hi Bad Boys franchise-a a film palina niin, Will Smith leh Martin Lawrence te an inkawp leh a, kumin nipui laia film tlangzarh zingah chuan a che tha ber a la ni. US-a dollar maktaduai 56 a lak luh bakah ramdanga a lak luh te nen chuan opening weekend-ah dollar maktaduai 104.6 a tlin nghal der mai. He film siam nan hian dollar maktaduai 100 vel an seng.
He film a che tha hi Will Smith tan a lawmawm lehzual a, kum hnih kalta a Oscar show-a host, Chris Rock hmaia a ben avanga a mualpho zêk hnua a rawn comeback lehna a ni a, a career-in lei rem a rawn rap leh tan ta a tih theih ang chu.
Kar kalta box office No.1 The Garfield Movie-in dollar maktaduai 10 la lut lehin box office No.2-ah a tawlh a, he film hi dollar maktaduai 60 (marketing tel loin) senga siam niin, tunah chuan khawvel huapin dollar maktaduai 192.7 a la lut tling ta.
Fantasy comedy ‘IF’ pawh a la che tha thawkhat a, Ryan Reynolds channa hian dollar maktaduai 8 la lut lehin No.3 a la ni a, e film pawh hian kar thum chhungin khawvel huapin dollar maktaduai 160.7 a la lut tling ve ta bawk.
Film tlangzarh thar, supernatural thriller ‘Tha Watchers’-in dollar maktaduai 7 la lutin No.4 a ni. He film hi director hriathlawh tak M. Night Shyamalan produce niin, a fapa Ishana Night Shyamalan-a direct a ni ve thung.
Kingdom of the Planet of the Apes-in dollar maktaduai 5.4 la lut lehin No.5 a la ni a, he film pawh hian khawvel huapin dollar maktaduai 359.8 a la lut tling ve ta bawk.
Box office top 10:
1 Bad Boys: Ride or Die $56,000,000
2 The Garfield Movie $10,000,000
3 IF $8,000,000
4 The Watchers $7,000,000
5 Kingdom of the Planet of the Apes $5,400,000
6 Furiosa: A Mad Max Saga $4,245,000
7 The Fall Guy $2,700,000
8 The Lord of the Rings: The Fellowship of the Ring $2,441,275
9 The Lord of the Rings: The Two Towers $1,914,981
10 The Strangers: Chapter 1 $1,840,000