Mahni kea din tuma bei ngam thalaite sawrkarin thawhpui tum

Thalai theihna nei, mahni kea din tuma bei ngam entreprenuer-te chu sawrkarin Bana Kaih Policy hmangin a thawhpui dawn tih chief minister Lalduhoma chuan a sawi.
Mizoram Khadi & Village Industries Board Multi Disciplinary Training Centre (MDTC) Zemabawka course hrang hrang zir mek thalai mi 126 bul tanna pualin Ningani khan hun hman a ni a. Hmanpuitu chief minister chuan, ram pawna inhlawh emaw mahni rama mahni kutkawiha hma lak tum tan skill neih a ngai a. Skill engemaw kan neih theih nan MKVI-in training a buatsaih thin, tiin, thalai za chuangin an tuina lam nia an hriat an zir tur chu a lawmpui tih a sawi.
Kan nitin mamawh thil engkim deuh thaw state pawn atanga lakluh a la nih laiin, kan siam chhuah ve mai theih thil tam tak awm achu ngaihven bik tula a hriat thu a sawi a. Engemaw mipui mamawh siam thiam chuan e-commerce hmangin zau taka zawrh theih a ni tawh tih sawiin, mite duh zawng siam chhuah thiam chu a pawimawh lai ber a ni tih a sawi a ni.
“Thalai theihna nei, mahni kea din tuma bei ngam entreprenuer-te chu sawrkar hian Bana Kaih Policy hmangin kan thawhpui dawn a, tun amite pawhin chutiang mi chu nih tum ang che u,” Lalduhoma hian a ti.
MDTC hi training centre chauh niloin production centre a ni tel a, kum1987-a din a ni. Tunah thawktu 53 an awm a, fund hi KVIC atangin an dawng a, trade 11-ah training an kalpui thin. IIT Gauhati nen tangdunin trade pathumah PMKVY training an kalpui tel bawk. Tun tum bikah hian a tirah mi 152 an inziaklut a, an zir rei chhung a inan loh avangin 126 an la awm mek.
MKVIB hi a din atanga tun thlengin mi 4280 an training chhuak tawh a ni.