World Blood Donor Day hmang Thisen pek dan phung thlak a tul – Health minister

June 14 kha World Blood Donor Day a ni a, he ni denchhen hian Mizoram hmun hrang hrangah pawh hun hman a ni. Aizawla Mizoram State AIDS Control Society (MSACS) leh Association for Voluntary Blood Donation (AVBD) tangdun huaihawt a hmanpuinaah Health minister Lalrinpuii chuan, khawvel thiamna sang zelah thisen pek kawngah pawh tha zawk leh hlawk zawk an hre chhuak zel a. Vawikhata thisen pek huk aiin pek zinin a daihzai zawkin a tangkai thei zawk tih an hre ta tih a sawi.
Thisen chu rei tak a dah theih loh avang leh thisen tharlam chauh khawl hmanga thliarhran theih a nih avangin, thisen tharlam hi lut reng se duhthusam a ni tih sawiin, “Thisen petute hemi kawngah hian insiamrem hlek hlek tum ila kan hmasawnna tur pakhat niin a lang. Pawl anga thisen pek hian boruak nuam tak hnuaiah thisen kan pe a, pek tam pawh a awl deuh thin. Amaherawhchu vawikhata pek huk a, chawlh leh vang vang aiin chawl rei loa vawi khata tam tak ni lo, pek kal reng dan ngaihtuah ila, hetiang system-a pek hi kan intih hmuh a tul chho tial tial dawn,” a ti.
Thisen mamawh damlo hman tur, anmahni taksa ami ngei sawrchhuaka midang tana an thisen hlan thintute chu Mizoram mipuiin zahna chibai kan buk thar tih Health minister hian sawiin, “Thisen petute Ni a nih angin, thisen petute hi kan ‘hero’ in ni a, in hlutna hre thar lehin thisen pe tura inhlantharna ni atan hmang ila; a la pe ngailote pawhin thisen pe turin thu tiam ila; thisen pe chak em em, hrisel lohna avanga pe theilo mi tam tak an awm a, thisen pe theia hriselna neih hi Pathian thilpek ropui tak a ni tih hria in midang tan malsawmna ni zel ang u,” a ti.
Mizoramah sawrkar kum liamta, 2023 April – 2024 March inkar khan thisen unit 35619 pek a ni a. A thlawn (voluntary) a pek unit 32493 niin, zaah 91.22 a ni. Kum kal mek, April – May chhung hian thisen unit 3142 pek a ni tawh a, heng zinga unit 2886 (91.85%) chu voluntary-a pek a ni.
AVBD chhinchhiah chinah, kum 1993 khan voluntary blood donation hi Mizoramah zaah 1.79 a ni a, kuminah chuan zaa 91 a pel tawh a ni.
Kuminah hian AVBD Branch tin ten an branch huamchhungah thisen petute chawimawina an siam angin, Aizawl district-a Blood Center pathum – Civil Hospital Aizaw, Synod Hospital Durtlang leh ZMC Falkawna thisen pe tha category 5-ah thliarin chawimawina an hlan a ni.