Central-a Mizoram tlak nat loh dan tur zero level vel a ni – Dr K Beichhua

Mizoram Lok Sabha MP-in thlawp lam a neih loh avang hian NDA sawrkara Mizoram tlak nat loh dan tur chu zero level emaw a hniam, minis one hial pawh a ni thei tih BJP MLA Dr K Beichhua chuan a sawi.
Zirtawpnia BJP State office-a inkhawmah Dr K Beichhua chuan, India rama sawrkar tharah Mizoram kan hai a, awn lam kan nei lo chu a pawi takzet tih a sawi. State dangten an state tana hamthatna hrang hrang an hmuh theih nan NDA an thlawp mek laiin, keini state erawh hawi lam nei loin, tumah thlawp lo ang kan nih avangin kan hawihil hle dawn nia a lan thu a sawi.
“Central-a Mizoram kan tlaknat dan hi teh ta ila, tun dinhmunah chuan zero level emaw chu aia hniam minus one (-1) a ni. Central atang hian beisei kan nei chaurau viau dawnin a lang a. Mizoram mipui kan thanharh a hun a, kan state ringawt thlir loin, state dangte pawh kan thlir tel ve a hun ta,” a ti.
Chutianga Mizoram tan ke kan pen chhuah hun hunah development kan beisei dik tak kan hmu thei dawn tih State BJP hruaitu hian sawiin, “Mizoram mipui hian hlauh tur dik tak kan hlauh a, hlauh loh tur pawh kan hriat a hun takzet,” a ti. BJP that zia hria a, a bikin Aizawla huaisen taka BJP vote tute avangin beiseina kawl a eng zel tih a sawi a. Kum 2028 inthlanpuiah chuan Mizoramah BJP sawrkar an neih ngei tawh a ring tih a sawi.