Post Malone & Morgan Wallen ‘I Had Some Help’ a la Hot ber

Post Malone ‘I Had Some Help’ featuring Morgan Wallen chu Billboard Hot 100 (singles) chart-ah a No.1 a, he chart-a kar nga a No.1-na a ni ta. Hetihrual hian Sabrina Carpenter hla ‘Please Please Please’ chu No.2-ah debut-in, a hla dang ‘Espresso’ chu No.3 an kai ve ta bawk a, Billie Eilish ‘Birds of a Feather’ pawh top 10-ah a lang.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
‘I Had Some Help’ hian kar khat chhungin US-ah stream maktaduai 43.3 le sales 12,000 a la kai thei a, radio airplay pawh ngaithlatu maktaduai 66.2 a la nei thei bawk a, hei hi a zawna kar nga nan chart-ah a No.1 pui leh ta a ni. He hla hi nikum January-March chhunga Miley Cyrus hla ‘Flowers’ he chart-a kar ruk a No.1 hnua No.1 ni rei leh thei ber a la ni a, nikum May-July chhunga Morgan Wallen la ‘Last Night’ a zawna kar 10 a No.1 hnua he chart-a a zawna No.1 ni rei leh thei ber a la ni bawk.
Sabrina Carpenter hla ‘Please Please Please’-in stream maktaduai 50.3 leh sales 7,000 neiin, radio airplay-ah pawh ngaithlatu 5,33,000 a nei thei a, hei hi cart No.2-ah a debut a, a hla dang ‘Espresso’ pawhin stream maktaduai 38.4, sales 28,000 leh radio airplay-ah ngaithlatu maktaduai 47.7 a la nei thei a, No.3 a kai ve ta bawk.
Sabrina Carpenter hian Hot 100 chart history siamin, soloist zinga he chart-a midang zaipuina tel miah lo va chart top three-a hla pahnih a ruala nei thei hmasa ber a ni. Hetiang tithei dang hi The Beatles chiah an la awm a, chu pawh kum 60 kalta daih tawh kha niin, an hla ‘I Want To Hold Your Hand,’ leh ‘She Loves You’ te chu 1964 khan February leh March thla chhungin kar sarih chhung a rualin chart top three an lang char char a ni.
Shaboozey ‘A Bar Song (Tipsy)’ chu No.3 atangin No.4-ah a tawlh a, Tommy Richman ‘Million Dollar Baby’ pawh No.3 atangin No.5-ah a tawlh a, chart No.1 hlui Kendrick Lamar ‘Not Like Us’ chu No.5 atangin No.6-ah a tawlh ta a, chart No.1 hlui bawk Hozier ‘Too Sweet’ chu No.7-ah bawk a la awm a, Eminem ‘Houdini’ chu No.2 atangin No.8-ah a tawlh ta bawk.
Billie Eilish hla ‘Birds of a Feather’-in stream maktaduai 30.7, sales 3,000 leh radio airplay-ah ngaithlatu maktaduai 3.2 neiin, chart No.11 atangin No.9 a kai a, Eilish hla he chart top 10-a lang thei pasarihna a ni.
Chart top 10 khartu chu chart No.1 pawh lo ni tawh Teddy Swims ‘Lose Control’ niin, No.8 atangin No.10-ah a tawlh ve ta bawk.