Yoga chawilarna Ni hmang

Khawvel ram dangte rualin Aizawla Yoga tuipuitute chuan Zirtawpni zing khan Hawla Indoor Stadium-ah International Day of Yoga vawi 10-na lawmna an hmang. Kumin thupuiah “Yoga for self and society” tih hman a ni.
Hmanpuitu larsap Dr Hari Babu Kambhampati chuan India atanga Yoga pianchhuah dan leh, tunah chuan khawvel pumah mi tam takin tuipuiin nitin an taksa sawizawina atan an hman thin thu a sawi a. Yoga hmanga taksa insawizawi chu hriselna a nih bakah ram leh khawtlang hrisel zawk siam tumna kawngah hmalakna pawimawh a ni tih a sawi. Mizoramah Yoga tuipuitu an pung zel chu lawmawm a tih thu sawiin, a ram hmelhmang mawi leh boruak thianghlim tak chu Yoga hmanga insawizawina atan duhthusam a ni tih a sawi bawk.
Thusawitu dang, chief secretary Dr Renu Sharma chuan tunlai khawvel, hmasawnna leh kawng engkima intlansiaknaah hian rilru leh taksa hriselna atana tha lo kan nitin nunah kan tawng thin a. Hetiang hunah hian kan taksa leh rilru hriselna ngaihpawimawh chu kan thlahthlam tur a ni loa, hriselna atan kan tih theih awlsam tak leh hautak lo, khawi hmunah pawh tih theih chu Yoga a ni tih a sawi.
He hunah hian Yoga tuipuitute bakah NER directorate leh Group HQ Silchar kaihhruai Mizo Bn 1, Mizo Air SQN 1 leh Mizo Bn NCC 20-a NCC cadet-te bakah an commanding officer leh instructor-te an tel a. Yoga hmanga insawisawi a ni.
Report-a a lan danin, AYUSH directorate hnuaiah Yoga instructor 12 an awm mek a, District Hospital 8-ah leh Civil Hospital Aizawl, Integrated AYUSH Hospital Thenzawl leh Administrative Training Institute-ah te dah an ni.