EURO 2024 THUNAWI: A siruk lain an intauh ta…

Jipson S. Hrangate, AFC Referee

EURO 2024 THUNAWI:
A siruk lain an intauh ta…
Khawvel football tournament ropui Euro 2024 kal mek chu a siruk laa an intauh lai mek niin, a hmunawm rep rep thin hle. ‘A ruh no no chhuak’ takmeuh a thlen tak avangin hneh loh palh vaih chuan haw nel nel a ni tawh mai!
Tun tum Euro Round of 16th chu 3rd League matches anga rin kai lo leh rinloh kai thung tih vel kha a awm tawh meuh lo, chak tura kan lo rin deuhte kha chu an chak thleng par par niin a lang.
Tin, heta thil mak ve angreng chu Round of 16th fixture (format)-a veilam zawngte (left flank) zinga inkhel turte (vs) team hming ziak hmasak zawngte kha e.g. (Spain vs Georgia); (box/grid chhunga ziak a nih chuan ‘Spain’ hi a chung lama awm tur a ni) ding lam pawh right flank-a mi pawh hi (Rom vs Ned, Austria vs Turkey) tih lo zawng chu team ziak hmasa zawkte chu an chak vek. Hetiang thil thleng (phenomenon) hi World Cup-ahte pawh a lo awm tawh thin.
Fixture ziah dan sawifiah lawk ila
World Cup, Euro, Copa etc. ahte hian match khel turte tana lekha an pawh (draw) apiang hian team (ram) hming pawh hmasak zawk kha ziah hmasak tur a ni a; box/grid chhunga kan ziah chuan pawh hmasak kha a chung lama awm tur a ni.
Hemi ziak hi lekha danga kan copy chhawn leh pawhin kan ziak danglam tawh tur a ni lo; a chhan chu team hming pawh hmasak zawkte khan an inkhelh huna an hak atan uniform jersey duh ber thlan theina ‘right’ FIFA chuan a lo pe tawh a ni. Hemi chanvo (prestige) hi team-te tan a hlu ve em em a ni.
Team tinte hian an uniform jersey duh bik/ber an hak ni hian an ‘daupui’ (vanneihpui) bikin an inhre thin. A lo dik ziah thin bawk!
Eg. 1: Brazil hovin World Cup vawi 5 an lak (win) tawh zawngah khan final an khelh ni hian an uniform chhuanvawr (Yellow Jersey, Blue Shorts & White Socks)-in an inthuam ziah thin.
Eg. 2: World Cup 2010 khan final match fixture kha Netherlands vs Spain tiha ziak a nih vangin Spain khan an uniform jersey chhuanvawr (Red+Blue) an ha thei lo tlats! Match tawp hnu, trophy an dawm hma siin an uniform (Red+Blue) chu FIFA-in hak an la phalsak hram a nih kha.
EURO 2024 comments
Tun tum Euro-ah chuan khawvelin kan chhuanvawr C. Ronaldo a chetha thei meuh lo! Direct free-kick tihte chu sawi loh, direct free-kick hnai ber (12yds) keeper chauhin a ven tawh ‘penalty’ pawh a la pet goal lo a nia, a hnar chu a hmu lian lurh lurh khawp mai! Quarter-final atanga tala a chetthat viau tawh loh chuan football khawvel hi a mangtha (bye-bye) a ngai tawh mai thei a ni!
Kumin Euro knock-out stage-ah hian rin loh takin penalty shoot-out a tlem dawnin a lang tlat. Kum dangah kha chuan R-16 atanga final thleng hian penalty shoot-out vawi 4 tal a awm thin kha a ni a, final thleng ilo thlir ang u. Euro 2024 chauh ni lo world record-ah pawh match khata penalty shoot-out-a goal save hnem ber (vawi 3) chu Portugal keeper Diego Costa a lo ni ta… Khatiang kha a la awm ngai zen zen lo.
Heading uluk sual
Austria vs Turkey (R-16) khelh tuma Austria midfielder Christoph Baumgratner-a’n hun pekbelh minute thumna a kal mek laia crossing-ball na taka a tauh kha ground-a ting tur kherin ti lo se chu a goal ngei ang!
Heading strikes zawng zawngah hian crossing-ball na taka lo thlawk phei direct heading (chal tauh) hi a force a na ber a, keeper-in an save zen zen lo. European style-ah hian heading ball ground-a tinga goal kher hi an ching thin a, hei hi Maradona khan a ngaisang lem lo, “Goal score tur chuan a remchang hmasa ber zawn thiam a tha ber, style mawi a tul hran pa lo,” a lo ti thin.
European style leh South American style tehkhaikhinna chu hun remchangah kan la sawiho turah ngai ila…
Spain-ho hian tun tum Euro record an la break zel. Anni chauh hi solid point (9) hmu chunga group champion awmchhun an ni.
An goal-ah tumah in an la pet lut lo a, anmahni’n an thun palh tih thu chauh a ni.
Copa America lam ve thung
Copa America hi TV-ah live-in en ve thei lo mah ila you-tube, mobile,etc. lamah chiangkuang lo deuhin kan en thei hram zel.
Defending champion Argentina chu he thu buatsaih lai thleng hian an la dam zel rih a, quarter-final pakhatah Ecuador nen July ni 5, 2024, tukin zing dar 5:30 khan an inkhel a, tunge chak zawk kan hre hman ta lo.
Argentina hian Spain-ho world record kawl mek an rawn um pha ang em? I lo thlir ang u.
Spain kha kum 2008 Euro-ah an champion a; 2010 World Cup-ah an champion zui bawk a, 2012 Euro-ah an rawn champion leh bawk a nih kha.
Argentina pawh 2021 Copa-America ah an champion a, 2022 World Cup-ah an champion leh a, 2024 Copa America-ah hian rawn champion turin kan beisei, Spain-ho record um pha turin…