LPS Fight Night-ah Ramfela kan hmu dawn lo

Chhungkaw thila a buai deuh avangin HC Lalramfela a inhnukdawk a, LPS Fight Night-ah Pro Fight champion lai panga zinga pathum – Laldinsanga, Lalruatzela Hauzel leh C. Lalhruaitluangate an inlan dawn.
July ni 26, Zirtawpni zan khian LPS Arena, Falkland-ah 2023 Pro Fight boxer langsarte tan professional inhnek buatsaih a nih dawn bakah Olympics thlir chungin Mizo boxer beiseiawm leh kum lama la naupangte tan hun tha siamsak an ni dawn.
Pro Fight weight hrang pangaa champion lai zingah flyweight title kawl mek NT Lalbiakkima’n tunhnaiah hliam a nei a, mi mala a remchan tawk loh bawk avangin a tira ruahmannaah a tel lo.
Lightweight champion Ramfela erawh Pro Fight final-a a hneh tak Cherhlun boxer C. Lalhruaitluanga nen inhnek nawn tura tih a ni a, tihhlawhtling ngei duh mah se eizawnna lama a buai vanglai a nih avangin a duh angin a inbuatsaih thei lo a, a rih deuh hlek tawh bawk avangin tel ve lo mai turin thutlukna a siam ta a ni.
LPS Pro Fight bantamweight title fight-a hmuhnawm taka inhnek tawh champion lai Laldinsanga leh Ramdinthara’n intawng nawn leh turin thutlukna an siam fel ve ve a; Pro Fight middleweight title fight-a inhmachhawn tawh C. Lalhruaitluanga leh F. Lalthanliana Junior an innuai nawn leh dawn bawk.
Welterweight champion Lalruatzela Hauzel chuan hnuhma tha neih belh tumin Luangmual Lunglei boxer Lalmuanpuia a hmachhawn dawn a; anni bakah hian Pro Fight flyweight title fight-a chak zo ta lo Vanlalenkawltira leh 2022 Pro Fight bantam champion Lalrinngheta an inhnek dawn a ni.
Khawvel huap professional boxing chhinchhiahna boxrec-ah inhnek pali ziahluh a ni dawn a, boxrec-a lut ve lo turin flyweight huangah Melthum boxer Emmanuel Vanlalthlengliana leh Benjamin Laldindika an inhnek dawn a, kum naupang boxing zir mek atangin inhnek pakhat a awm tel ang.
LPS Promotion chuan Fight Night-ah hian mipui hmuh chak inhnek dang chhawpchhuah tel tumin hma a la mek bawk a, tunkar chhungin inhnek turte contract ziahtira tihfel hman vek a tum a ni.
Pro Fight champion-te inlanna tur
Tarlan tak angin, LPS Promotion chuan LPS Arena, Falkland-ah Mizo professional boxer-te tuaihriamna leh boxing boruak siamthar lehna’n tun thla Zirtawpni hnuhnung ber zanah Fight Night huaihawt turin thutlukna a siam fel.
Inhnek vawisarih awm tura tih niin, he’ng zinga panga hi khawvel puma professional boxing chhinchhinna boxrec-ah ziahluh a ni dawn a; hmasawn beiseiawm boxer naupang zawkte tan inhnek dang pahnih ruahman telin, Olympics hmathlir bawhzuina peng khat atan hman nghal a tum a ni.
Nikum Pro Fight bantamweight final-ah derthawng takin Dinsanga a chak a, nasa taka round li an inhnek tawn hnuah Pangzawl tlangval Ramdina’n tawnhriat a tlakchham tuarin point a hloh a, uiawm takin a tlawm phah zui a ni.
Anni pahnih hi Fight Night inhnek pui berah an intawng leh dawn a, round ruk chhung inhnek tura tih an ni a, inbuatsaihna chawl loa an kalpui zui avangin hmuhnawm lehzuala innuai thei tura beisei an ni.
Boxrec-ah chak hnuhma neih belh tumin Pro Fight champion dang, lightweight title kawltu Ramfela, welterweight champion Ruatzela leh middleweight champion Hruaia’n Mizo boxer tha an hmachhawn dawn bawk.
Pro Fight champion lai mi panga zingah NT Lalbiakkima’n flyweight final-ah sawi hlawh takin Vanlalenkawltira a hneh a, tunhnaiah mimal harsatna a neih avangin Fight Night-ah a inlan dawn lo a, a vawikhatna’n professional huanga chak tumin Enkawltira a inhnek dawn a ni.
Dinsanga leh Ramdina ni lo boxrec-a ziahluh tur inhnek dang pali hi round li theuh a ni dawn a, boxrec-a ziahluh loh tur inhnek dang pahnih awm telin, round 3 a ni ve thung ang.
2023 Pro Fight flyweight huang atanga hriat hlawh, Biakkima hneh zo loa tla ve ve Melthum boxer Emmanuel Vanlalthlengliana leh rawlthar Benjamin Lalrindika an innuai dawn a; anni bakah hma lam hun thlir chunga boxing zirlai pahnih an inhnek bawk ang.
LPS Promotion chuan October ni 29-a Pro Fight tan turin ruahmanna a siam fel nghal.
Kum 2009 atanga 2019 thleng promotional fight atan tum riat hman a nih hnuah kum 2022 atangin kumin hi professional kalphung zuia huaihawt a nih vawithumna tur a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More