Delhi-ah Taiwan Expo hawng Taiwan tan kan inhawng – CM

Taiwan External Trade Development Council India bultumin Thawhtanni atang khan Bharat Mandapam, Pragati Maidan New Delhi-ah ‘Taiwan Expo 2024 India’ neih a ni a, Mizoram chief minister Lalduhoma chu khuallian a ni. Expo-ah hian Taiwan company 120 chuang an tel.
Chief minister chuan Taiwan-in technology innovation lamah entawntlak takin hma a sawn a, culture ropui leh hmasawn zelna tur remchang tam tak a nei tih a sawi. Mizoram chu Taiwan nena thuk zawka inpawh turin a inpeih a, India hmarchhak state, South East Asia ramte nen awlsam taka inkalpawh theihna, sawrkar laipuiin Act East Policy a kalpui mekna hmun pawimawh a ni tih a sawi bawk.
“Taiwan leh Mizoram hi Tropic of Cancer paltlang ram ve ve, sik leh sa, ei leh in leh kawng tam taka nunphung inang tak nei kan ni a. Taiwan company-te Mizorama rawn luta kan rama theihna leh remchang awmte rawn daidar turin ka sawm a. Ka kaihhruai sawrkar hian infrastructure lamah leh sumdawnna lamah nasa zawka hma sawn tumin kan bei mek a, in tan kan inhawng a ni,” a ti.
India – Taiwan Labour Mobility Agreement buaipui mek chu Mizo thalai tam takin an chhawr tangkai a beisei tih Lalduhoma hian a sawi a. Mizoram University leh Taiwan ram university pahnihten thawhdunna thuthlung (MoU) an ziah chu tha a tih thu sawiin, tunah pawh Taiwan-ah Mizo aiawh pawl pahnih an zin mek tih a sawi. Mizo thalaite skill development lama kaihruai turin Taiwan technology company leh university-te chu a sawm a ni.
Taiwan Expo neihna hmunah hian chief minister Lalduhoma leh Foxconn India aiawh V. Lee chu an inkawm a. An company-a Mizo thalaiten hna an thawh ve theih dan tur leh Foxconn lamin Mizorama thilsiamna an kalpui ve theih dan zirchian lam an sawi dun.