CBI phalna pek ngaihnaah sawrkar a tlanchhe dawn lo – ZPM

CBI hnena general consent pek chungchanga inhnialna awm mekah dan awmsa anga kal a ngaih avangin state sawrkar phalna lak hmasak phawt ngai mah se, ZPM sawrkar chu ‘consent’ pek kawngah a intiam angin a hnungtawlh dawn lo tih ZPM chuan an sawi.ZPM Legal department chuan CBI general consent pek kawnga sawrkar puhmawhna awm mekah Vigilance department-in sawifiah tawh tho mah se, politics thila kaihluh a nih avangin sawifiah ve a ngai tih an sawi a. MLA inthlan dawna an intiam angin, ZPM sawrkar chuan CBI hnenah general consent a pe tawh a. Criminal law thar hnuaiah CBI hotute ngen angin consent pek thar leh a ni mai chauh tih an sawi.
Section 17A(1) of the Prevention of Corruption Act 1988 (PC Act) angin CBI an ni emaw ACB emaw eng investigating agency pawh nise, an office duh duh khawih nghal bawrh bawrh phalsak an ni loa, an mi chhui duh kha a hna atanga chawlhtir leh file khawih thei lo tura dah hmasak leh, sawrkar hnathawkin inhumna dan a neih angte hre chunga hma lak a ngaih avangin, hemi zulzui hian CBI laka chhui phalna pekah pawh sawrkar remtihna lak hmasak a ngai tih chu he notificiation-in a tum ber a ni zawk tih an sawi a ni.
He dan bung leh chang – Section 17A of PC Act hi 2018 July 26-a PC Act-a dahluh (insert) thar a ni a, chu chu ‘legal expert’ ni lem lo tan chuan hriat loh palh theih a ni reng a ni, tiin, tunah hian he section hi paihthlak tumin challenge a ni nghe nghe tih an sawi.
Pawikhawihna chhui kawngah, thilsual titu man danah kalphung zawm ngei ngei tur ‘procedure’ a awm a. Danin a phut ang thlapa investigation kalpui a, mihring man a, bungrua mansak a ngai thin tih Legal department general secretary Vanlalsiama Pachuau chuan a sawi a. CBI an ni emaw, state police pawh nise, danin thuneihna a pek chin (jurisdiction leh power) pawn lamah eng tih theihna mah an nei loa; mahni thuneihna ni lo an lo thawh kha dan bawhchhiatna a nih leh daih vangin CBI pawh a fimkhur tih a sawi bawk.
“Criminal law thar kan hman vanga notification chhuah thar hi general consent sutna emaw nuaibona emaw a ni loa, danin a phut angin Mizoram sawrkar hian a chhuah thar leh mai a ni. CBI hnena general consent pek hi a la ding reng a, state sawrkar hnuaia thawkte corruption leh pawikhawihna chhui tura CBI hnena consent pek kawngah state sawrkar a hnungtawlh dawn lo,” a ti.
ZPM kaihhruai sawrkar chu eiruk do kawngah a dinna ngaiah a la dingnghet a, mipui vei em em, dan loa kuhva tawlha public interest litigation thehluh (Vanramchhuangi vs Union of India & Ors.) case-ah pawh, sawrkar kalta in CBI chhuitir kher tul a tih loh laiin, ZPM sawrkarah chuan PIL thehluttu in CBI chhuitir tura a ngenna chu sawrkar lam atangin hnialna leh dodalna a awm lo tih High Court-ah kumin June 12 khan affidavit thehluh a ni tawh tih an sawi a ni.
Ministry kalta hun laia case langsar tak tak, Lokayukta-a inchiah mek – Lengpui Airport sak chungchang, school thuamthatnaa NABARD sum chingpen thu, ropeway leh skywalk chungchang pawh CBI-in chhui ngei se an duh a. Lok Ayukta hi independent body a nih angin sawrkar thuhnuai a ni loa, ngenna erawh a party angin thlen an tum tih ZPM Legal department hian an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More