Billboard chart record siamin Shaboozey ‘A Bar Song (Tipsy)’ a Hot ber

Shaboozey hla hit ‘A Bar Song (Tipsy)’ chu Billboard Hot 100 (singles) chart-ah No.1 a kai ta a, he hla hi ot Country Songs-ah a No.1 bawk a, tihian Shaboozey hian Billboard chart history siamin, mihang mipa zaithiam zinga Hot 100 leh Hot Country Songs a No.1 ni kawp thei hmasa ber a ni a, mihang hmeichhe zingah pawh hetiang ti thei hi Beyonce chiah a la awm. Tun hi Hot 100 chart-ah a No.1 vawi khatna a ni a, hetihrual hian Chappell Roan pawh a hla ‘Good Luck, Babe!’ avangin a vawi khat nan Hot 100 top 10-ah a lang ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US stream(official audio leh official video) bakah radio airplay leh sales data te chu tehna pawimawh a ni.
Virginia khawchhuak Shaboozey hi a hming tak chu Collins Obinna Chibueze a ni a, ‘A Bar Song (Tipsy)’ hma hian April thla kalta khan a hla pahnih Hot 100 chart-ah a lo lan pui tawh a, Beyonce a zaipuina ve ve niin, Beyonce album Cowboy Carter a hla ‘Spaghetti’ leh “Sweet * Honey * Buckiin’ te niin, chart No.31 leh No.61 an ni.
‘A Bar Song (Tipsy)’ hi a album ‘Where I’ve Been, Isn’t Where I’m Going’ atanga a single a ni a, he album hi Billboard 200 (albums) chart No.5-ah a debut thei nghe nghe a ni. He hla hi kar khat chhungin US-ah stream maktaduai 44.8 leh sales 23,000 tlingin, radio airplay pawh ngaithlatu maktaduai 60 an tling thei a, hei hi Hot 100 chart No.2 atangin No.1 a kaipui ta a ni.
He chart-a a zawn ni lova kar ruk No.1 thei Post Malone ‘I Had Some Help’ featuring Morgan Wallen chu No.1 atangin No.2-ah a tawlh a, chart No.1 hlui Kendrick Lamar ‘Not Like Us’ chu No.3-ah bawk a la awm a, Sabrina Carpenter ‘Espresso’ pawh No.4-a bawk awm lehin, Tommy Richman ‘Million Dollar Baby’ chu No.6 atangin No.5 a kai thar leh thung.
Chart No.1 hlui, Sabrina Carpenter ‘Please Please Please’ chu No.5 atangin No.6-ah a tawlh a, chart No.1 hlui bawk Hozier ‘Too Sweet’ chu No.7-ah bawk a la awm a, Benson Boone ‘Beautiful Things’ chu No.8-a bawk awm lehin, chart No.1 hlui Teddy Swims ‘Lose Control’ chu No.9-ah bawk a la awm.
Chappell Roan pawh a vawi khat nan Hot 100 chart top 10-ah langin, a hla ‘Good Luck Babe!’ chu sgtream maktaduai 20.9leh sales 15,000 bakah radio airplay ngaithlatu maktaduai 16 neiin, No.11 atangin No.10 a kai thar a, he chart top 10-a a lan vawi khatna a ni.