LPS Fight Night 2024: Dinsanga vaupung a na thlawn dawn em?!

Bosch Home Appliances LPS Fight Night-a intawng tur Laldinsanga’n a hma aia awlsam zawkin Ramdinthara a hneh theih a inring a, round ruk ngai lova chak hman a inrin thu a sawichhuak.
Thla riat kalta khan LPS Pro Fight bantamweight title fight-ah Dinsanga a derthawng a, round hnuhnung berah Ramdina’n tawnhriat a tlakchham avanga point paihsak a nih hnuah 38-37, 39-36, 40-35-in a chak hram.
July ni 26, Zirtawpni zan Fight Night inhnek paruk awm tur zinga pui berah an intawng nawn leh dawn a, Pangzawl boxer Ramdina’n a hma aiin a hnek a na tawh zawk a, hma a sawn bawk tih a sawi hnuah kum 21 mi Dinsanga’n a hma aia awlsam zawka a hneh theih ngei a inringtawk ve thung.
Ramthar Lunglei tlangval hi kum 2022 khan a vawikhatna’n Pro Fight-ah a tel a, fly title hnekchhuakin, kum 2023-ah bantam-ah a insawn a, weight hrang pahniha champion zingah a tel zui nghalin, kum zawnin best boxer-a thlan a ni bawk.
Pro Fight-a tum riat a inhnek tawhah chak vekin, professional huanga tum ruk a inlan tawhah mi pali a knockout a, kum 21 mi ve bawk Ramdina a hneh a nih chuan vawisarih a inhnekah tum sarih a chak dawn tihna a ni.
Dinsanga chuan, “Round 6 hman zawh ngai loin Ramdina hneh ka tum a, kan intawn hmasak aia awlsam zawka hneh turin ka inbuatsaih,” a ti.
Khelo India State Centres of Excellence (KISCE) hnuaia awm tura thlan a nih hnuah kumin kum tir atangin Dinsanga chawl loin a inpuahchah a; professional-a insawrbing a duh avangin kar hmasa khan KISCE a chhuahsan.
Tunlai Mizo boxer zinga thiamna nei tha ber pawl Dinsanga’n Ramdina nen an inhnek hmasak tumin ruahmanna a siam fuh tawk lo tih a sawi a, “Hmuhnawm taka inhnek ka duh avangin a tir atangin inhawng takin ka bei a, a fuh tawk lo deuh tih ka hria, mahse, tunah chuan fimkhur tak chungin ka bei dawn a, ka thiam dan leh ka theihna a tha thei ang bera pholan ka duh a, tha taka ka khelh theih ngei pawh ka ring,” tiin a inrintawk dan chimchin a sawichhuak.
Thui tak thlen tumin Dinsanga’n hma lam hun a thlir a, tunah hian Dubai, United Arab Emirates-a inbun AAM Seddiqi Sports LLC company chuan an hnuaia contract ziak turin an dawr a, kum khatah international fight vawithum tal siamsak an intiam a ni.