Haas-in Magnussen chhawr zui dawn lo

US lama inkulh Haas Formula One team chuan nakkum hian Kevin Magnussen an ruai tawh dawn lo tih an puang a, season thara Briton Oliver Bearman-a team-mate thar tur pawh tunge tih an sawi lo.
World Drivers’ Championship standing-a 16-na luah mek Magnussen thlaktu tur inrinsiakna kal mekah BBC Sport chuan tun season kal laia Alpine tana intihsiak hmachhawn Esteban Ocon chu Haas hian an bia niawmin an tarlang.
An information dawnna hi Haas leh Frenchman Ocon-a career chelhtu ni mek Mercedes lam hnai tak niin an sawi nghe nghe.
BBC rin dan anga Ocon hi an ruai a nih chuan kum tharah Haas hian F1 line-up thar hlak an chhawr dawn tihna a ni a, tuna Magnussen-a Haas team-mate ni mek Nico Hulkenberg hi Sauber team lamah a kal ve dawn bawk a nih kha.
Magnussen hian kum 2017 atanga 2020 chhung khan Haas tan F1 inelna hmachhawn tawhin, 2022 season tan hma khan Russian Nikita Mazepin lamah contract a ziak a, mahse, Russia-in Ukraine a run avangin Mazepin kha an hnawtchhuak leh ta si a, a team hlui Haas-ah bawk a kirleh ta a ni.
US team tana a chetthat ber la ni chu pangana a ni mai a, tum thum he dinhmun hi a luah tling thung. Championsip standing-a kum a khar that ber chu kum 2018-a pakuana a luah kha niin, a career-a a race result tha ber chu McLaren tana a debut race 2014 Australian Grand Prix-a pahnihna dinhmun a luah kha a ni.