Tenacious D chuan world tour an neih mekah tunlai hian Australia-ah hun an hmang mek a, mahse, an band member pakhat-in US President hlui Donald Trump thah tumna chu fiamthu thawh nana a hman avangin sawiselna nasa tak an tawk a, Australia-a show an neih leh tur zawng zawng pawh cancel vek a ni.
Tenacious D hian Sydney-a ICC Sydney Theatre-ah show an nei a, hetah hian an band member Kyle Gass pianchampha lawmnan Jack Black-a’n stage-ah Kyle hi cake a present a, chutah chuan eng nge a duhthusam an zawt nghal a, Gass chuan, “Tih leh hunah chuan Trump kha thelh tawh suh,” tiin Inrinni kalta a Trump thah tumna chungchang chu a sawi chhuak a. Concert chhimtu mipui te an nui mai nain, he thil avang hian sawiselna an tawk zui ta a ni.
Gass pawhin thupha chawina Instagram-ah a post zui ve nghal a, “Tharum thawhna lam chi reng reng hi tu chungah pawh tleng se ka pawm thei lo. Thil thleng kha a lungchhiatthlak a, ka ngaihtuahna mawlmang tak avangin pawi ka ti takzet a ni. Mi rilru ka tihnat zawng zawng te chungah thupha ka chawi takzet a ni,” a ti.
He fiamthu hian nghawng a nei thui ta hle a, Gass hi a agent-in an thlauhthla nghal a, an band Tenacious D-in tour an la hmabak zawng zawng pawh cancel vek a ni. Gass-a bandmate Jack Black pawhin thupha chawina a tichhuak a, Tenacious D hmachhawp te pawh tihtawp lailawk vek a nih thu a puang tel bawk.
Tenacious D-in Australia leh New Zealand-a show vawi ruk an la hmabak chu cancel nghal vek a ni a, Newcastle, Brisbane, Melbourne, Adelaide, Wellington leh Auckland an kal tur chu thulh vek a ni a, October thlaa US-ah sow vawi nga an neih tur pawh tunah chuan an chiang ta lo.
Donald Trump thah tumna a fiamthu nana hman avangin Tenacious D tour an titawp
Get real time updates directly on you device, subscribe now.