Badminton inkhawmpui lian

Badminton Association of India (BAI) Annual General Meeting chu Pathianni khan Taj Vivanta, Guwahati hmunah nghah niin, he hun ah hian Mizoram Badminton Association aiawhin hruaitu pathum an tel.
He meeting lian hi BAI president leh Assam chief minister ni bawk Himanta Biswa Sarma chuan kaihruaiin, thu pawimawh tak tak rel a ni a, kum 2024-2025 chhunga BAI calendar tur siamin, pawm nghal a ni.
He AGM-ah hian MBA atangin Senior Vice President leh BAI executive member ni bawk H. Lalnunsiama bakah MBA vice president Lalchhuanawma leh MBA joint secretary C. Zoremsangate an kal.
BAI executive committee meeting neih hmasak niin, AGM-in a chhunzawm a, he’ng meeting pahniha an thurel pawimawh zualpuite chu:

1. BAI annual report te, AGM hnuhnungber minute leh season hnih kaltaa audited account statement-te ngaihthlak niin, pawm a ni.

2. Kum 2024-2025 auditor tur ruat a ni a, tin, BAI registration chungchang pawh sawi a niin, thuchhuah siam vat a ni ang.

3. Age category bikah kum dik loa khel an la thahnem viau nia lang chu sawiho niin, BAI-in a rang lamin hma a la ang a, thuchhuah pawh siam thuai a ni ang.

He’ngte bakah hian thu pawimawh dang dang rel niin, lo bawhzui tur siam a ni a; state association tinte hnenah cheng nuai 7.5 theuh pek an ni a, an hmalaknate report an thehluh leh a ngai thung.