Nadal champion zo lo

Paris Olympic Games tennis tournament atana inbuatsaih mek Rafael Nadal chuan kumin January thla hnu lama inelna a hmachhawn leh vawikhatnaah Pathianni khan Swedish Open final a khel a, Bastad khaw final-ah hian straight sets hmangin a tlawm!
Kum 38 mi ni tawh Spaniard hi Portuguese seventh seed Nuno Borges chuan 6-3 6-2-in a hneh a, 2022 French Open trophy a lak hnua title match a khelh leh vawikhatnaah darkar khat leh minute 27 lek chhungin 22-times Grand Slam champion Nadal a tlawm fel hman der a, Borges ve thung tan a tour final hmasaberah trophy a hmin nghal.
He ATP Tour 250 event-ah hian kum 2005 daih tawh khan rawlthar kum 19 mi lek ni chungin Nadal hian singles title a lo hlawhchhuak tawh a, kha mi hnu khan Bastad khaw tournament-ah hian a inlan leh ta lo vang vang a, kum tam tak hnuah Paris 2024 Gamea-a Olympic medal lak duh inbuatsaihna avangin a chhuak leh a, rawlthar a nih lai ai khan tawnhriat a ngah zawk ngial chungin a champion zo ta lo a ni.
Tarlan tawh thin angin, khel bawr na avangin Nadal hi nikum chhung zawng tih theih kha khelmualah a inlan thei lo a, kumin kumtirah inelna hmachhawn turin rawn ‘comeback’ zuai mah se tihrawl nain a tlakbuak zui leh a, fit chiang lo chungin French Open-ah a inlan a, first round a paltlang zo lo.
Roland Garros-a clay-court grand slam title la hnem ber nia Paris khuaa French Open title 14 la tling Spaniard hian July 27-August 4 chhunga a tlangnelna mual Roland Garros-a khelh tur Olympic tennis tournament atana inbuatsaih a duh avangin kumin Wimbledon pawh kha a hawisan a, Sweden ramah final lutin, champion zo ta lo mah se hliamin a tibuai lo leh tha taka tournament a khel zo thei kha Paris-a medal a beiseina kawngah beiseina siamsaktu a ni ngei ang.
Nadal hian kum 2008 khan Beijing-ah Olympic singles gold medal lain, 2016 Rio de Janeiro Olympic-ah khan doubles gold a awrh leh a; kumin Paris Games-ah hian doubles bikah kum 21 mi lek ni chunga major title pali la tling der tawh Carlos Alcaraz nen an inkawp dawn a ni.