Hmeichhe badminton champion An-i
Hmeichhe badminton champion An-i
Badminton women’s singles Olympic gold medal match-ah Thawhtanni khan South Korea player An Se-young chuan 21-13, 21-16-in He Bingjiao of China a hneh.
Women’s singles world’s number one leh world champion ni bawk An hi court chhunga a chet vel danah badminton legend Lin Dan nen khan khaikhin a ni fo a; Thawhtanni khan a ke dinglam chu bandage lianpuiin a tuam a, 2023 Asian Games laia a hliam kha a a rawn chhuah leh avangin kumin January thla 2024 India Open atang pawhin a lo inhnuhdawh phah tawh a ni.
Dam chiang zan lo chunga hnehna a sualchhuah hnuah South Korean chuan a dinhmun sawiin, “Ka hliam hi hneh a harsa viau mai a, Olympic tan hma lawk pawhin ngai ka la awh lo kha a ni a, he gold medal zinkawng hi ka coach-in min daikaipui ka ti lo thei lo.
“Dream lianpui nei tur hian ka insehruh ve thin a, chu ka duhthusam tipuitlin tur chuan inrintawkna ka nei a, ka la naupan avangin ka tana hun tha ber hi la herchhuak loah ka ngai a, game tha zawk la hmuhtir leh cheu che u ka tum a ni,” tiin khawvel hmaah thiamna sang zawk la phochhuah leh tur neia a inngaih thu a sawichhuak.
Kum 22 leka upa An hian an rama a haw hun chuan a kut ngeiin champagne bottle a khiat dawn tih a tarlang tel!
Badminton-a an ramin Paris gold medal an beisei hnuhnungber thlir tura Arena lut South Korea fans beiseina a thlawn lo.
He ram hi Olympic badminton bika ram hlawhtling pathumna niin, kum 1992-a Olympic sport atana badminton telh a nih hnu khan South Korea hian Games tinah he inelna atang hian medal pakhat tal an la hui kim vek a, an aia team hlawhtling awmchhun chu China leh Indonesia-te chiah an ni.
Indonesia nula Gregoria Tunjung chuan inkhel hah loin women’s singles bronze medal a hlawhchhuak a; a chhan pawh a tumpui tur Spain aiawh Carolina Marin chu Pathianni khan Chinese player He nen women’s singles semi-final match pakhat zawk an khelh laiin khup hliam serious hmel takin a tlakbuak a, match laihawlah khel chhunzawm thei loin a inhnukdawk a, inkhel loin Tunjung kutah bronze a lut ta mai a ni.