France leh Tahiti tana surfing gold awrhtu Vaast

France leh Tahiti tana surfing gold awrhtu Vaast
Olympics men’s surfing event chu France sawrkar hnuaia inrelbawlna hran neia awm semi-autonomous territory an tih mai French Polynesia thliarkar ram bung khat Tahiti-a Teahupo’o tuifawnah nghah niin, he hmuna cheng Tahitian Kauli Vaast chu Thawhtanni khan pakhatna niin, Tahitian-te hi inrelbawlna hran neia khawsa ni mah se civil leh politik thilah French citizen dik tak an nih avangin Paris Olympic Games-ah pawh hian France hmingin Vaast hi a chhuak a, France leh Tahiti tan gold medal a dawng a tih theih ta a ni.
Surfing thiam hriat hlawh Australian Jack Robinson hmakhalh thei kum 22 mi Vaast chuan a seilenna thliarkar Teahupo’o tuifawn awmdan a hrechiang a, chungnung taka final thununin, gold medal a hlawhchhuah hnuah a hlawhtlinna chu a lo suangtuah thin a taka lo chang ta a nih thu a sawi a, a tana history thar chu Tahitian zawng zawng bakah Polynesia leh France tan a hlan tih a sawilang tel.
Vaast chuan, “Surfing hi kan culture-a bet tlat a nih avangin he hmuna cheng tam zawk hian kan uar a, Polynesia hi surfing lo chhuahna a nih avangin ka chhuang a, chuti khawpa inzawmna thuk nei kan nih avangin he hlawhtlinna hi ka tan chuan thil namen a ni lo,” a ti.
Brazil infiammi Gabriel Medina kutah bronze medal a lut ve thung.
Women’s final lamah chuan United States nula Caroline Marks a chak ber a, 2023 World title a lo dawn tawh belhchhahin Olympic gold lawm tur a nei leh a; point tlemtea a hmakhalh Brazil aiawh Tatiana Weston-Webb chuan silver a awrh ve thung. Johanne Defay of France chu bronze medal dawngtu a ni.