Ramri-ah Assam Police-in hma an la – Home minister

Ram neitu zawk nia Mizoram leh Assam-in kan inchhal ve ve na hmunah Assam Police-in hma an la tih Home minister K Sapdanga chuan a sawi.
Thawhlehnia Assembly Session-ah zawhna chhangin Home minister chuan, state pahnihin an ram nia an chhal ve ve na hmunah Assam sawrkarin Assam Police camp panna tur kawngah hma an la tih hriat a ni tih a sawi a. Kolasib district thuneituten a hmunah endik nghalin, kawng sialsa an siam tih hmuh a ni a, an hna leh an hmalakna chawlhtir nghal tura hriattir an nih bakah Kolasib district bawrhsap-in Cachar leh Hailakandi district bawrhsap hnenah status quo bawhchhe lo tur leh an hmalakna titawp nghal turin a hriattir tih a sawi.
Serlui bialtu MLA Lalrinsanga Ralte chuan Home minister-in ramri ah Assam lamin hmalakna thar an nei lo tih a sawi ni ah Assam Police-in Vairengte Aitlang rama Pu Samuel-a huanah metre 200 chuang an lai a. An kawng laihna hnuaia Pu Chhandama huan paltlanga Assam Police camp tlafual zawk panna tur laih leh an tum chu Vairengte mipui thawm neih vangin hma an la zui rih lo tih a sawi.
August 1 zing dar 3-4 inkar velah Vairengte Auto Rickshaw Stand-ah Assam Police ho kalin auto driver ho hnenah an document an dil tih Home minister hian a hriatpui em, tih a zawt bawk.
Home minister chuan, state pahnihin ramri kan tih a inang loa, chu ngaihdan inang lo karah chuan harsatna a thleng thin a; ramri chin hriat dan inang lo vangin status quo siam leh inbiakna pawh awm a ni tih a sawi. Ramri chin sawn chungchangah sawrkar hmasa an fakawm tazket tih a sawi bawk.
“Sawrkar hmasa lai atangin inbiak a ni a, ramri rin turin boruak tha siam a ngai, tiin boruak tha tak hnuaiah lungrual takin an lo inbia a. Sawrkar tharah chief minister pahnihin chaw ei duna bul tanin, ramri ah boruak tha tak hnuaia inbiak an rawt a; Assam lamin Goodwill Mission hnuaiah inbia ang, tia an rawn rawt angin chhunzawm a ni,” a ti. Minister level-a inbiak hnu ah technical thil chu official level-a la inbiak tur a ni tih a sawi a ni.