Borapansury-a thil thleng vangin MZP-in Chakma chhuah a khap

Lawngtlai district Borapansury-a Mizo Police pahnih Chakma nu hoin an khawih rawn nia sawi chu duhloin Mizo Zirlai Pawl chuan Chakma-te sahimna atan pawn chhuah a khap.
MZP Gen. Hqrs thuchhuak chuan, Chakma khua Borapansury-a Mizo Police pahnihin Chakma nuho kut an tawrh thu sawi chungchangah Mizoram chhung ngeia Mizoram Police an him lo leh kut an tuar ta mai chu hriatthiam har a tiin a dem takzet tih a sawi.
Mizo Police kutthlaktute zawng chhuaka case siamsak turin sawrkar a ngen tih a sawi. Pawikhawihtute case siamsak an nih hma chuan Chakma-te an sahimna atan pawn chhuak lo turin MZP chuan a hriattir.
MZP Hqrs Lunglei pawhin tunhnaia Lunglei leh a chhehvela Chakma-te chet dan chu pawi a tih thu a sawi a. Borapansury-a Mizo Police-te Chakma nu hoin kut an thlak thu sawiin, sawrkar hnathawk an hnathawhna hmun ngeia chi leh chi buaina cho chhuak zawnga kut an thlak chu a duh lo hle tih a sawi. August 17 zan khan Tlawng leh Mausen inkarah Chakma 5-in Lungleia ei leh bar chawluttute hriamhrei nena vauin kut an thlak a, pawisa tam tham tak an laksak tih a sawi bawk.
August 20 atangin tiamchin awm loin Lunglei district huamchhungah Chakma-te chu an sahim zawk nan pawn chhuak lo turin a ngen a, pawn chhuak luia kut tuar an awm a nih chuan MZP-in mawh a phur dawn lo tih a sawi a ni.