J.Lo leh Ben Affleck in\hen vawi 2-na

An innei a, an inthen vang vang a, midang an nei leh ve ve a, an then leh ve ve hnuah 2021 khan inngaizawng thar lehin, 2022-a an innei leh a, tunah chuan Jennifer Lopez leh Ben Affleck te chuan inthen zai an rel leh ta. J.Lo-i’n a pasal nena inthen dilna court-ah a theh lut leh ta tlat mai.
Anni pahnih inkar hi a tha lo tih chu kumin kum chawhma lam atanga khan sawi thawm a awm tawh a, August ni 20 kha an inneih champha vawi hnihna niin, hemi ni takah hian J.Lo zawkin court-ah inthen dilna hi a theh lut a, an awmhran tanna chu April ni 26, 2024 anga tarlan a ni tawh thung.
J.Lo leh Ben Affleck te hi Gigli film an chan dunna atanga inzui ta an ni a, chu chu 2002 kha a ni. 2004-ah pawh Jersey Girl tih film an chang dun leh a, chumi hnuah inhualin, 2003-ah Los Angeles ah an innei a, official taka an inneih atanga thla hnih khat lek a ral tihah 2004 khan an inthen leh ta a ni. Anni pahnih hi an lar vanglai taka inzui an ni a, hetih lai hian an hminglemah Bennifer tih te an larpui hle.
An inthen hnuah J.Lo hi zaithiam lar Marc Anthony nen innei, fa phir Max leh Emme an nei a, Affleck pawh Hollywood star Jennifer Garner nen an innei ve bawk. Mahse, hmangaihna lamah an vanduai nge ni, an kawppui te hi an then leh ve ve a, chumi hnuah chul hlui rìtin an inzui leh a, August 2022-ah Riceboro, Hampton Island, Georgia-ah an chhungkhat laina hnai leh thiantha te sawmin an innei leh ta a ni.
J.Lo hian pasal pali nei tawhin, Ben Affleck nena an inneih nawn leh hma hian Ojani Noa, Cris Judd leh Marc Antony te nen ‘tiam tlat e,’ an lo ti tawh a, Affleck pawhin Jennifer Garner chu ‘a nuam emaw a hrehawmah emaw…’ a lo tihpui ve tawh bawk.