Mizoramah ruah la sur turah ngai

Bangladesh hmarlama thlivir insiam avangin tun ni hnih awm tur chhung hian Assam, Meghalaya leh Tripura ah ruah sur nual tura rin a ni a. Mizoram bikah chuan August 24-27 inkar chhung hian chhimlam – Lunglei, Lawngtlai, Siaha, Mamit leh Serchhip district-ah a tam zual tura ngaih a ni.
Sawrkar thuchhuah danin, he ruahpui sur avanga kuthnathawktuten harsatna an tawh loh nan leh an lo inhmakhua lawk nan AgroMet Field Unit (AMFU), ICAR Mizoram Center leh Mizoram sawrkar Directorate of Agriculture, Meteorological Centre (Aizawl) leh District Agro-Met Unit (DAMU), KVK Lengpui inthurual chuan a bik takin kuthnathawkte hriat tur an tichhuak a.
Khaw chhiat laiin leitha pek leh hlo kap tih lo turin, August 24 – 27 inkarah ruah a sur tam hmel avangin ruahsurin thlai rah leh thei rah a den chhiat loh nan net hmang emawa khuh hram a that thu an sawi. Leiletah tui a tam lutuk chuan luan chhuahtir a, hmun zawla thlai chingte pawhin thlai hmuna tui a tlin loh nan tui luanna tur siam turin an chah.
Tunhnaiah ruah a sur nual bakah ala sur nual hmel avangin thlai hmuna tui a tlin loh nan tui luanna tur tha taka siam turin an chah a. Tuiin lei a chimin thlai zung tawih a awm duh a, thlai an thih phah thin tih an sawi.
‘Thei leh thlai rah an huh hian a rit duh a, a zar an uai nat avangin a zar a kurin a tliak duh thin; chuvangin a zar do that tur a ni. Tlangram buh a vui chho tan tawh a, chuvangin ruahsur nasain a tih tluk loh nan mahni remchan danin lo inhmakhua tur a ni,’ an ti.
Ruah a la sur nual hmel avangin ruahtuiin lei hanna a kalral pui lutuk loh nan buhpawl emaw hnim emawa lei khuh tura chahin, ‘Lei khuh hian thlai tlu tur leh a zung lang tur a veng ve a ni,’ an ti. Khua a chhiatin thlaiah ‘bacterial wilt’ natna a awm duh a, he natna a awm a nih chuan streptocycline 0.6g chu tui litre khata pawlhin khaw that laia kah tur a ni tih an sawi.
Sangha dil siamtute tan, dil chhunga tuihawk a luh hian chirhdiak leh bawlhhlawh a ken tel teuh thin avangin, a luan luh lohna’n a bul velah tui luanna tur tha taka siam turin an chah. Sangha dil a khah loh nan a luan chhuahna tur siam a, a luan chhuahna turah hian sangha an chhuah loh nan net hmanga khuh turin an chah a; khaw chhiat laia leitha pek vak leh sangha chaw pek tam hian dil chhunga oxygen a tlem phah thin avangin pe vak lo turin an chah bawk.