Damdawi zuarten CCTV vuah tha

Lunglei khawpuia damdawi zuarte hnena CCTV vuah vek tura district bawrhsap atanga hriattirna pek chu an zawm tha tih sawi a ni.
Lunglei District Level NCORD Committee huaihawtin Lunglei khawpui chhunga damdawi dawr nei (pharmacist /general drug licence holder) te kohkhawm niin, ruihhlo do kawnga mawhphurhna an neihte inhrilhthar a nih bakah hma lak ho dan tur sawi a ni.
Lunglei additional DC James Miahlung chuan District Level NCORD Committee kaltlangin ruihhlo do kawngah nasa taka hma lak a ni tih sawiin, ruihhlo hman khawloh venna pakhat atan damdawi dawrah leh maxi cab counter-ah CCTV vuah vek tura hriattirna chhuah a ni tawh a; thuneitute atangin endik a ni tawh bawk a, Lunglei khawpui chhunga pharmacy-te chuan cctv vuah hi an zawm tha tih sawiin, an chungah lawmthu a sawi.
DC office, Food & Drugs Administration, Excise & Narcotics leh Police atanga official kalten ruihhlo hman khawloh venna leh ruihhlo hluar zel tur venna kawnga damdawi dawrte mawhphurhna an sawi a. Damdawi ruihtheih hralh chhuah chungchanga fimkhur a tul thu leh kum tling lo hnena pek loh tur a nih thu te, damdawi dawra cctv vuah vek tur tih chu tha taka zawm a pawimawh thu leh Schedule H drug prescription register vawnthat a tul thute inhrilh nawn a ni.
Damdawi dawr neite chu damdawi an zawrh theih loh chin kawl lo tura chah an ni a. Damdawi ruihtheih chi hman khawloh venna kawngah damdawi zuarte chu a veng theitu ber an nih angin, anmahni an fihlim piah lamah dan loa thilti te thlithlai a, thuneitute hnena thlen thin turin an chah bawk.
He hunah hian damdawi zuar kal khawmte nen ruihhlo dona kawnga hma lak ho dan tur sawi a ni a. Damdawi zuarten an damdawi kawl leh hralh chhuahte an chhinchhiahna register fel taka vawn dan tur inzirtir a ni.