Hmeichhe chunga hleilenna laka invenna lam inhrilhfiah

Mission Foundation Movement (MFM) in a kalpui mek, hmeichhe chunga hleilenna laka inven dan tur inhrilhfiahna chu Inrinni khan AMC Ward No. XII huamchhungah corporator C Vanlalhruaii nen tangdunin neih a ni.
He hunah hian AMC Ward No. XII huamchhunga MHIP member-te, local council member-te bakah vengchhung mi engemawzat an tel a. Resource person-ah Women and Child Development department (State Hub for Empowerment of Women) gender specialist Lalrohlui Ralte hman niin, hmeichhiaten an tana dan awm an hriatchian a pawimawh a, harsatna an tawha tanpuina an dawn theihna tur Women Helpline No. 181 chu tu tan pawh engtik lai pawha biak theih reng a ni tih a sawi. An department-in hmeichhe baihvai zawkten lei rem an rah theihnan Shakti Sadan leh hmeichhiaten harsatna an tawh pawha an tlanluh theihna, One Stop Centre a awm thu a sawi a. Zawhna awmte a chhang bawk.
MFM director R Vanlalzauva chuan, an project – “Gender Based Violence” an kalpui dan a sawi a. School leh biak in hrang hrangah hemi chungchanga inhrilhhriat a nih bakah school thenkhatah chuan hmeichhiate tan taksa lama mahni invenhim dan, self-defence class an kalpui mek tih a sawi a ni.