Kan kawng siam ruahin min tihchhiat sak leh zel – PWD minister

Kawng chhiat zia an hria a, an siam tawh chin pawh fur ruahtuiin a tihchhiat sak leh mai thin avangin mipuiin an hriatthiam an beisei tih PWD minister Vanlalhlana chuan a sawi.
Thawhtannia ZPM party office-a inkhawmah PWD minister chuan, tunlaia kawng chhiat zia leh siamthat a tul zia hi a hrechiang hle a, department hotute nen ngaihtuahna sengin ruahmanna pawh an siam a ni. Sawrkar hmasa hunlaia kawng siam chu fur khat daih tura an beisei laiin a daih ta si loa, fur lai a ni nen, rem leh rem lo chung pawha kawngchhe siam hna an thawk chung pawhin a tuk lawkah fur ruahtuiin a tihchhiat sak leh mai thin tih a sawi.
“Khaw awmdan hian a zir miau loh avangin mipui pawhin min hriatthiam ka beisei a ni,” a ti.
Mizoram kawng chu PWD-in a enkawl vek loa, NHIDCL-in Mizoram kawng tam tak a enkawl mek a, kawng thenkhat chu BRTF-in a enkawl bawk tih minister hian a sawi a. Kawng chhia siamthat kawngah beisei anga an chet chak thin loh avangin PWD-in hma a lak khalh lo thei thin loa, mipui tan harsatna a thlen an hlauh thin vangin PWD an che chhuak thuai thin zawk tih a sawi a ni.
Transport minister ni bawk Vanlalhlana chuan an department chu two wheeler taxi permit pe chhuaktu a ni a, sawrkar hmasa hunlai khan politics khelh nan leh mite tih lawm nan an lo hmang thin nia a hriat thu sawiin, “Two wheeler taxi hi mipui mamawh aia tam a awm tawh nia kan hriat avang leh eizawn nana hmang mekte kan tihbuai loh nan politics khelh nan hman kan tum ve lo,” a ti.