Turkey-ah NE India Festival nei

Consulate General of India, Istanbul Turkey leh North East Institute of Fashion Technology (NeIFT) Guwahati ten Istanbul Turkey-a ‘North East India Festival -2024’ an buatsaihah telpui tura an sawm angin, Mizoram Art & Culture minister C Lalsawivunga chuan September 6 khan a hmanpui.
Arunachal Pradesh Textile & Handicrafts minister bakah hmarchhak state hrang hrang atangin department secretary leh director-te an kal a. Istanbul mayor leh Municipality hotute, Istanbula ram 37 aiawhte an kalkhawm a, ram hrang hrang Consul General an tel a ni.
Art & Culture minister hian India hmarchhak state-te chu kan awmna hmunin a zir loh avangin India ram lairila state dangte nen an inlaichinna a tha tawk lo hle tih a sawi a. Kan Indian puite ngei pawhin min mikhual en bakah ramdang mite phei chuan India mi kan ni tih rin harsa an ti hle a, hetiang hun tha leh remchang India Consulate Turkey leh NeIFT-in a buatsaih sak chu lawmawm a tih thu a sawi.
He Festival ah hian hmarchhak state 8 atangin hnam lam, hnam zai leh malzai entira ni a. Mizoram atang pawhin Cheraw entir a ni. Hmarchhak state tina designer-ten an thawmhnaw design an pho chhuak a. He programme hian India leh a bikin Northeast-a hnam hrangte culture hausa tak leh ziarang danglam tak leh thing leh mau, leilung mawi tak kan neihte chu ramdang mite mit hmuha phochhuah a, khawvel hriata tarlan chu a tum pakhat a ni.
Minister hi Art & Culture director Carol VLMS Dawngkimi leh Cultural Troupe ten an tawiawm a ni.