Handholding scheme inhrilhfiah Kuminah pilot phase kalpui phawt ang: CM

Mizoram State Policy Coordination Committee huaihawtin Mizoram sawrkar Flagship Programme Handholding Scheme chungchang inhrilhna hun chu minister-te leh sawm bikte pualin nimin khan Planning & Programme Implementation Conference hall-ah chief minister Lalduhoma kaihhruaiin neih a ni. Handholding Scheme hi September, 2024 chhunga hawn hman tura ruahman a ni.
Chief minister Lalduhoma chuan, Bana Kaih Scheme a taka kalpui a ni thei hnai ta chu lawmawm a tih thu a sawi a. Kumin bik hi chu pilot phase angin kan kal phawt ang a, nakkum atang chuan lian taka kalpui kan tum ang, tiin a sawi.
Dr. KC Lalmalsawmzauva chuan Handholding Scheme atana inbuatsaih dan leh sawm bikte puala inhrilhna hun buatsaih a nih chhante a sawi bawk.
Lalmalsawma Pachuau, Member Secretary, MSPCC chuan scheme kalpui dan tur a sawifiah a. He scheme Apex Body chu Mizoram State Policy Coordination Committee a ni a. Nodal department thlan chhuahte hmanga kalpui tur component panga nei a ni ang. Hmalakna chhawrtute hi beneficiary ti lovin progress partner tih tur a ni a, dil tur a ni. Thawhpui tur hi line department ten an thlang ang a, training leh thil tul dang apiang an tihpui ang a, hma an lakna tinah an kaihruai dawn a ni. A kalpui dan tur kimchang te, a dil dan te, a bawhzui zel dan tur te chu hawn a nih hnuah chiang zawka tarlan a ni ang.
C. Lalrinfela, Informatic Officer, ICT chuan Handholding Scheme Portal a sawifiah bawk.
Thlai thar lei dan tur ruahmanna inhrilh hriat nghal a ni a. Sawrkar chuan ruahmanna a lo siam tawh angin thlai thlan chhuah palite chu a tul ang zela support price pek a ni dawn tih tarlan a ni.