Aizawl tui lakna tûrin hrai

Aizawl khawpui chawmtu tui lakna chu tûra hrai a ni a, pawikhawihtute pawh man nghal an ni.
Thudawn danin, Aizawl khawpui chawmtu pakhat, Serluia PHE tui lakna (intake) hnarah rannung thahna hlo (pesticide) hmangin luisa hrai an ni a. Lungleng ‘N’ khawtlang hruaitute leh Environment Forest &CC Department chuan an hriat veleh an theih anga ranga bawhzuiin, pawikhawihtua puh September 13 tlai khan, Zonunsanga (28) s/o Saikhamakawn leh RB Lalbuatsaiha (42) Chandmari Aizawl te chu manin thubuai ziahluh a ni.
Hemi kaihhnawiha thu dawn danin, luisa hraitute hian damdawi – Minister (Profenofos + Cypermethrin) chu awlsam takin ‘chakai manna’ tia sawi hmangin Kulikawn Ngaizela dawr atangin an lei mai tih an sawi a. Hei hi rannung thahna (pesticide) niin, a hlauhawm dan chin leh a thawh nat dan hriat ni lem lo chung pawhin, a bulhnaia awm ringawt pawh hreawm khawpa rim ru tak nei a ni tih sawi a ni.