Ni thum chhung lirthei dang tawh

Kawng siam vangin Aizawl pawhtu kawngpui pawimawh dan mek a ni a, ni thum chhung dan a ni tawh. Inrinni pawh hian dan a la ni dawn.
Mizoram pawhtu kawngpui pawimawh, Silchar lam atanga Aizawl luhna kawngpui a chhiat avangin Mizoramin harsatna a tawk mek a, he kawng chhia hi siam a nih theih nan lirthei hi dan mek a ni.
September ni 18 zan atangin Rengtekawn-ah police te’n lirthei an dang a, Kawnpui-ah an dang bawk. Kawnpui leh Khamrang inkar leh hmun dangah kawngpui hi a chhia a, PWD-in an siam chhungin lirthei hi lo dan a ni.
Police lam atanga thu dawn danin, kawng chhiaa tang lirtheite a tirah kaltir an ni a, anni hi an tlang deuh vek tawhah ngaih a ni. Police-te chuan Kawnpui leh Aizawl inkarah lirthei 10 vel, a chhiat avanga tlan thei lo la tang a awm a, a dang chu a tlang tawh an ti.
Kawng chhiaa tangte phurh luh bungrua hi tuna Aizawla lei tur la awmte hi a ni tlangpui tih thu dawn a ni a, ni tin mamawh thil engemaw zat chu Aizawlah a vang mek.
Kawnpui-ah hian Sairang lama kal tur chu 407 chung lam an dang a, Durtlang lamah LMV hnuai lam kal an phal. Durtlang lamah hian LMV hnuai lamin bungrua an phur thei a, hei hian mamawh a phuhru rihah ngaih a ni.
Aizawlah ni tin mamawh thil hrang hrang a vang a, whole sale-a petute’n neih loh an nei nual tawh. Petrol leh diesel a vang bawk a, tunlaiin Aizawl khawpui chhung a thawl thin. Petrol hi filling station-ah lei tur a awm mumal lo na a, black market-ah chuan a la awm reng.