Lirthei dintirte chhuah ta

Vairengte tlang dung kawngpui, Assam atanga Mizoramin bungrua a lakluhna kawng pawimawh a chhiat avanga lirthei dintirte chu Inrinni zan khan an chhuah a, Aizawlah ni tin mamawh thil a thlen thuai a beiseiawm tih thu dawn a ni.Assam atanga bungraw phurtu lirthei engemaw zat chu Rengtekawnah leh Kawnpui-ah police te’n an dintir a, Kawnpui atanga Sairang lam kawng, Aizawl luhna kawngpui pawimawh siam hna a tluan theih nan lirtheite hi September ni 18 atangin dintir an ni.
September ni 21 tlai dar 5.30 khan Aizawl lam pan tur lirthei hi tlantir an ni a, Rengtekawn-ah lirthei 200 vel, Kawnpui-ah 230 vel an lo ding hman. Zan dar 9 velah heng lirtheite hi an tlan hman vek tih thu dawn a ni.
Police te chuan heng lirthei tlantirte hi bungrua leh tuialhthei phur vek a nih thu an sawi a, tluang taka Aizawl an thlen chuan Aizawl mipuiin ni tin mamawh thila harsatna an tawh mek a zia theih a beiseiawm thu an sawi bawk.
Police te chuan lirtheite hi tlantir mah se Kawnpui leh Aizawl inkarah an tlan pur pur thei lo mai thei tih an sawi a, kawng chhia, tlan theih tura siam chuk chukah lirthei 400 chuang a rualin an tlan dawn a ni a, an tlan chak thei kher lo mai thei tih an sawi.
Chawlhni khan tuialhthei phur lirthei thenkhat chuan Aizawl an thleng a, ni tin mamawh thil phurte pawh thleng thuai tura beisei an ni. Kawnga harsatna tawk chungin lirtheite hi an tlan tih thu dawn a ni. Inrinni zan dar 10 velah khan lirthei pakhat chu kawng nalah a tang a, hel tuma an beihna lamah mi dang an tang ve leh a, lirthei engemaw zat chu a nghawng hman tih thu dawn a ni.
Ruahman dan chuan Chawlhni tlai dar 5.30 atangin Silchar lam pan lirtheite tlantir leh tum an ni.