Chin pawl inremlo ten Sawrkar hriatpuiin inremna zawng

Mizoram sawrkar hriatpuiin Burma ram, Chin State chhunga Chin pawl ho inkara inrem lohna awm mekah inremna kawng zawnga Zo Re-Unification Organisation (ZORO) huaihawtin heng pawl aiawh kalkhawm chuan ralthuam chelek zawnga hma lak loh leh Inremna Committee siam tha an ti.
Chin State chhunga cheng unau leh unau inkarah imhmuhthiam lohna awmin silai hial lekin an lo inkap tawh a, nunna chan pawh an awm a ni. Hei hi ZORO chuan tha ti loin inremna kawng a zawng a. Inrinni khan Aizawlah ZORO bultumin inremna thuthlung sawiho a ni a, Chin State-a Zofate – Chin National Front (CNF), Interim Chin National Consultative Council (ICNCC), Chin Brotherhood leh Chinland Council aiawh an tel.
ZORO general secretary L Ramdinliana Renthlei chuan ZORO-in remna palai hna a thawh chhan a sawi a. “Zofate chu unau vek kan ni a, inhmuthiam lo tur kan ni loa, tangrual tur zawk kan ni. Unau kan nih angin inthen thei kan ni loa, indo thei pawh kan ni lo. Zofate chu khawi hmunah pawh awm ila, lungrual taka awm tur kan ni a, keimahni leh keimahni hmelmaah kan insiam tur a ni loa, hmelma thuhmun nei tlang zawk tur kan ni. Zofate hi Pathian ringtu kan ni a, Pathianin min pui anga, engtik niah emaw chuan inremin kan la awm anga, kan la insuihkhawm vek dawn a ni,” a ti
ZORO vice president, adviser to chief minister Lalmuanpuia Punte, MLA chuan inremna tura thutkhawm hi Mizoram sawrkar duhdan a ni a, tuna inkawmkhawmna pawh hi sawrkarin a hriatpui tih sawiin, “Sawrkarin ZORO kaltlangin remna palai hna a thawk a. India sawrkar pawhin in inrem a duh a, India hian tanpuina min pek pawh a duh a ni,” a ti. Inremna thuthlung sawihonaah hian adviser to chief minister Dr Lorrain Lalpekliana Chinzah pawh a tel a ni.

Thawh hona thuthlung siam a ni a. CNF, ICNCC, Chin Brotherhood leh Chinland Government ten ZORO huaihawta inkawm khawmnaah hian uluk taka sawi ho hnuah –

* Keini, Zofate (Chin- Kuki- Mizo) hi thlahtu thuhmun, tawng khat hmang (same language – different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah thih leh ruam khatah ti thin unau kan ni.
* Kan ram leh hnam tana hma kan lakna kawngah kan thahnemngaih luat avanga unau kan inhmu thiam lo hi pawi kan ti a, tun hnuah thleng tawh lo se kan duh.
* Tun hnuah buaina leh harsatna a lo awm pawhin tharum leh ralthuam chelek zawnga hma lak loh nise.
* ZORO hmalaknaa inremna thuthlung sawiho hi tha kan tiin kan pawm a, inremna tluantling a awm theih nan a tul dan azira inbiak leh nise kan ti.
* Inremna Committee siam tha kan ti a, meeting leh hunah inremna Committee siam nise kan ti.