Bawng humhalh duhtuten Mizoram rawn luh tum mek

India ram pumah bawng sa ei tihtawp a, bawng humhalh duhna lantir tuma hma la mektuten sawrkar laipui nawrna atana ram pum huap campaign an beihna kal mekah hma latute hian Mizoramah campaign rawn neih an tum nia sawi a ni.Hindu sakhaw la run pawl zirtirtu pakhat – Shankaracharya Swami Avimukteshwaranand hnuaia hma la tute chuan India ram pumah bawng talh khap a nih theihna turin ‘rally’ buatsaih an tum a, state leh union territory tin fanchhuaha tlangaupui an tum a ni.
Tunhnaiah hmarchhak state pawh heng pawl hian hrutin, state tina rally neih an tum chungchang hi an sawi a. Nagaland leh Meghalaya-ah chuan anmahni dodalna hi nasa taka lantir zui a ni nghe nghe.
‘Gau Dhwat Sthapana Bharat Yatra’ tia vuah bawng talh khapna dan lekkawh tura nawr tumna hi Shankaracharya Swami Avimukteshwaranand thuihruaite hian Aizawlah pawh huaihawt an tum a, rawn luh an tum mek nia hriat a ni.
The Aizawl Post thudawn danin, heng pawlte hian an pawl hruaitu (convener) chu ‘state guest’ anga lo mikhual turin Mizoram sawrkar an ngen a, sawrkar hian a theih loh tur thu a hrilh tawh nia sawi a ni.
BJP Mizoram Pradesh lam zawhchiannaah, heng mite hian an rawn be pawp loa, central BJP hotute ngaihdanah pawh bawng chi tha, humhalh chi bik an awm a, hmarchhak miten kan ei chi bawng hi chu an ni serh zingah a tel lem lo tih an hrilh thu an sawi a ni.
2017 June 12 khan sawrkar laipui BJP kaihhruaiin bawng talh khapna a tuipui lai denchhenin, Mizorama Union minister Rajnath Singh lokal laiin, ‘ZOlife Group’ inti chuan Vanapa Hall kawtah ‘Bawngsa Ruai’ an lo buatsaih khum tawh a ni.