Golden card tum 112000 chhawr tawh

Kum 2018 September atanga Mizorama Ayushman card/ Golden card hman ve theih a nih atangin a chhawr theituten tum 112000 an chhawr tawh a, cheng vaibelchhe 123 chuang sawrkarin a hmang tawh.
Sawrkar laipuiin khawsak harsa zawkten an dam loh nikhuaa an damdawi in senso sawrkarin a tumsakna tura duan – Ayushman Bharat Pradhan Mantri Jan Arogya Yojana (AB PM-JAY) Mizorama kalpui dan thlirletin Thawhlehni atang khan Aizawlah Health department hotute an thukhawm a, vawiin – Nilaini thleng a awh ang.
Health & Family Welfare department hnuaia Mizoram State Health Care Society huaihawta hman a ni a. Health & Family Welfare minister Lalrinpuii bakah secretary Sangchhin Chinzah ten an hmanpui. District tina senior chief medical officer, senior medical superintendent leh medical superintendent ten an district leh hospital-a AB PM-JAY an kalpui dan an sawizau a. PHC, CHC leh Sub-District Hospital-a hemi kaihhnawih medical officer ho bakah Arogya Mitra leh Block accounts manager-te an tel bawk.
Mizoram State Health Care Society chief executive officer Dr Biakthansangi chuan Mizoram sawrkar health care scheme thar duan – Mizoram Universal Health Care Scheme kalphung a sawifiah a ni.
Mizorama AB PM-JAY hman kawnga hospital leh mimal tithate chawimawi an ni a. Mizoram puma ABPM-JAY hnuaia district hospital titha ber chu Civil Hospital Lunglei niin, lawmpuina certificate leh sumfai nuai khat hlan a ni a. CHC/SDH category-ah Vairengte CHC chu titha berin certificate leh Rs 70000 hlan an ni. PHC category-ah Kawrtethawveng PHC titha berin, certificate leh Rs 50000 hlan an ni. Heng bakah hian district tina Arogya Mitra thawk tha thlan chhuahte hnenah chawimawina certificate leh sumfai hlan a ni bawk.