Aizawl by pass road bul tan tir thuai turin sawrkar ngen

Sawrkar laipuiin Aizawl by pass road sialna tur sum a pekchhuah tawh chu a hnu lamah dan ang taka thil a kal zui zel theih nan hma lak tir thuai turin Mizoram sawrkar a ngen tih MNF hruaitu Er K Lalsawmvela chuan a sawi.
PWD engineer in chief hlui K Lalsawmvela hian tuna chief minister hian opposition a nih lai khan, an sawrkar hunah chuan contract hna reng reng EPC ( Engineering, Procurement and Construction) mode veka tih a ni ang, tiin a sawi thin tih a sawi a. EPC mode hi national highway atan chuan State PWD-in kum 2018 atang khan a lo hmang tawh a. ZPM sawrkar hnua department 4-a tender chhuah chu EPC mode hman lohna vek a ni thung tih a sawi.
MNF sawrkar laia ruahman felsa, Aizawl bypass road chu Ministry of of DoNER atanga sanction cheng vaibelchhe 500 vel hmuh chu sawrkar laipui thu angin kawng pumpui km.45 vel then darh phal loin contractor pakhat thawh turin tender chhuah mek a ni tih a sawi.
“Hei pawh hi EPC mode-a tender chhuah a ni a, agreement hi MoRT&H-in EPC contract document a ruahmansa angin ziah tur a ni ang. Sum hi central lam tum anih avangin, maintenance fund pawh defect liability chhung atan DoNER minstry tum tur a ni a. Defect liability period kum 5 chhunga maintenance sum tam zawk contractor-in a neih a, tha taka a enkawl theih nan EPC mode dan zawma contract agreement ziaktu officer-in, chief minister vaulawk anga hrem a tawh loh nan, finance changtu chief minister hian state budget atangin sum thahnem tak ruahman sak ngei turin ka ngen a ni,” a ti.