Dan loa kuhva lakluh do zel dawn
Dan loa kuhva lakluh do zel dawn
Home minister K Sapdanga chuan dan loa Mizorama kuhva rah lakluh chu sawrkarin theihtawp a do dawn tih a sawi a. MZP Assembly a hmanpuinaah ram leh hnam humhalhna atan zirna ngaihpawimawh leh ruihhlo do chu hna hmasaah neih a ngai tih a sawi.
Ningania Champhaia head of office-te nen an inkawmnaah minister chuan, dan loa kuhva lakluh chu sawrkarin theihtawp a do zel dawn tih hi sawiin, “Dan loa kuhva lakluhin a hrin chhuah – thalaite rilru tlahniam, lehkha zir tul tih lohna, sum awlsam duhna, in hmun lo ram man sang chak lutuk bakah ram chhunga kuhva chingtuten harsatna an tawhte titawp tura tan lak a ngai,” a ti.
Champhai Tlangsama neih mek Mizo Zirlai Pawl Assembly vawi 68-na, Ningania neih a hmanpuinaah K Sapdanga chuan, ram leh hnam humhalh lam kan uar a, tuna kan hnam min rûntu nasa ber chu ruihtheihthil a ni a, an thatlai hun hmang tha thei loin thalaiten an nunna hlu tak an chan mek tih a sawi.
Vawiin thlengin nau piang record-naah mipa an tam zawk zel a, an lo thanglian a, vote nei thei an nih chuan mipa aiin hmeichhe vote nei an tam zawk zel thin tih sawiin, “Kan thalai, a bikin mipa zingah ruihhloin bu a khuar nasa a, hei hian nunna a suat nasa em em a ni. Ram leh hnam humhalh nan zirna ngaihpawimawh leh ruihhlo do chu hna hmasaah neih a ngai,” a ti.
Zirnaah tan lak kan ngai tih Home minister hian a sawi a. All India Service leh central service-ah Mizo kan tling ngai ta mang loa, kan office-ah thutlukna siam thei hnamdang mi an thahnem tawh hle tih a sawi. “Kan elpuite hi kan state chhung amite chauh niloin, state pawna hnamdangte el tur leh an aia thiam tura zir a ngai,” tiin zirlaite a fuih.
MZP chu zirlaite chhertu, zirlaite hma ngaia an hmakhua sukawtu tur a nihna vawng reng turin a chah bawk.
Ningania MZP Assembly hi MZP president hlui, adviser to CM (Political) ni mek Lalmuanpuia Punte, MLA pawhin a telpui a. MZP president hlui tho, tuna MZP adviser ni mek C Lalrokhuma’n Assembly thupui “Ram leh hnam tan – Mizo Zirlaite” tih a sawizau a ni.