PUC zirlai thisen pe zaa 60-in HIV an kai niin thudik lo darh

Tunhnaia Pachhunga University College-in blood donation camp an neiha thisen an pek zinga zaa 60 chu HIV positive a ni, tiin thu dik lo a darh.
Association for Voluntary Blood Donation Gen. Hqrs. thuchhuak chuan, thisen pek reng reng hi a thianghlim leh thianghlim loh endik vek thin a ni a. HIV bakah natna dang lakah a fihlim leh fihlim loh endik vek niin, PUC zirlaite thisen pek pawh endik vek a ni a, HIV positive tam tak an awm anga sawi hi thu dik lo a ni tih finfiah a ni tih a sawi.
‘Miin thisen an pekte endiknaah HIV positive rinhlelhawm a awm a nih pawhin a hre tur takte bakin an hre ngai loa, mipui vantlang tan hriat theih a ni lo. Mipui vantlang hriat tura puanzar hi dan kalh a ni,’ a ti.
Tun thlengin thisen pek endik tawhah HIV positive rinhlelhawm tlemtê a awm tawh a, thisen pek percentage atanga chhut phei chuan a hniam hle tih sawiin, a bikin voluntary blood donor atang chuan HIV positive an awm ngai lo tih theih a ni tih AVBD hian a sawi.
‘PUC zirlaiten thisen an pekah HIV positive 60% an awm anga thu thehdarh hi dawt a ni a. AVBD chuan pawi kan ti takzet. Tun hnuah chuan thisen pek chungchangah leh tlawmngaia thisen petute tihnual thei thu dik lo thehdarh tawh lo turin mitin kan ngen a ni,’ a ti.