Hrileng karah vawk thinhrik tawh lo

African Swine Fever (ASF) vangin Mizoramin harsatna a tawk a, he hrileng vang hian vawksa hralh a kal loh lai te pawh a awm. Tunah chuan mipuiin vawksa an thinhrik tawh lem lo a nih hmel a, vawksa zuarte’n vawksa hralh a kal pangngai tawh, mipuiin an thinhrik tawh lo an ti.
Vawksa zuarte chuan hrilen hma ang chu a la ni pha lo a, mahse hrilen tirh lam leh a vanglaitea mipuiin an thinhrik ang kha chu a ni tawh lo a, vawksa hi hralh a kal leh tawh an ti.
Amaherawhchu, mipuiin an thinhrik tawh lo an tih rual hian vawk lei tur a tlem sawt tih an sawi a, vawk a thih nasat avangin a hma angin vawk talh tur an hmu zung zung tawh lo tih an sawi.
Hrilen vanglai khan vawk hi a tlawm a, tunah chuan vawk man pawh a tlawm leh tawh lo a, hrilen hma ang kha a ni pha leh tawh tih an sawi bawk.
Aizawl bazar lian pakhat Venghlui Bazar-a vawksa zuarte chuan Inrinni-ah vawk hi 10 atanga 13 an talh leh tawh tih an sawi a, tun hnaia an dinhmun enin, hrilen vanglai kha chuan vawk pahnih pathum te an talh a, chu pawh an hralh zo lo thin tih an sawi. Hrilen hma kha chuan Inrinni-ah vawk 20 te an talh thei a, chutiang chu la ni pha lo mah se tun hnaiah an vawk talh zat a pung tih an sawi.
ASF vangin vawk a thi nasa a, hri vanga tihhlum a tam bawk. Hei vang hian vawk talh tur hi a vang a, hrilen laia man tlawm zawka an bel thin laiin tunah chuan a man pangngaia lei turin zawn deuh fe a ngaih chang te a awm leh tawh an ti.
Vawksa zuar pakhat chuan ASF hi leng lo ta se Mizoramin vawk a ngah turzia a lang tih a sawi a, “Kan lo intodelh khawp mai. Kan intodelh lo kan tih te kha chu tih mai mai a lo ni. Vawk heti zat a thi a, chuti chungin vawk heti zat hi a la awm a, kan lo intodelh reng alawm,” a ti.
Kumin hian ASF vanga vawk thi hmasa ber chu February ni 9-a mi a ni a, April vel atang khan hri hi a hluar a ni. Tunah chuan a vanglai a pel tawhah ngaih a ni.