Aizawl FC sum dawn tur hreng khawtlai lo turin sawrkar ngen – BJP Mizoram

Aizawl Football Club-in North Lunglenga field an din meka an sum hmuh tur chu state sawrkarin a hreng khawtlai niin BJP Mizoram chuan an sawi a. A rang thei ang bera tihfel sak turin sawrkar leh Sports minister an ngen tih an sawi.
BJP Mizoram State thuchhuah tarlan danin, Power Finance Corporation (PFC) chuan an corporate social responsibility (CSR) fund atanga North Lunglenga Aizawl FC field-a phullem phahna tur cheng nuai 546.90 a pek chu Aizawl FC duhdan angin, Mizoram State Sports Council chu implementing agency-ah PFC-in a ruat a; 2023 October 11-a hna tan tura agreement ziah ni tawh si, tun thlengin hna tan theih a la ni lo tih a sawi.
‘He project hi hnuhdawh emaw paih leh theih emaw dinhmunah a din tawh a ni tih min hriattir tawh a, thalaite hmakhua ngaitu ZPM sawrkar hian he project hi a ranglama tihfel sak thuai turin kan ngen a. Hmalakna a awm lo a nih a, he sum hi withdraw emaw cancel emaw a nih chuan a mawhphurtu chu tunge tih mipui hriatah kan puang dawn a ni,’ a ti.
PFC pawhin MSSC-ah na takin lehkha a rawn thawn tawh niin BJP Mizoram hian a sawi a. He project tihkhawtlai chhan hi party politics tenawm tak vang ni ngeia an hriat thu sawiin, SASCI sum 1st instalment an hman mai loh vanga nuai 23331 a lapse ang kha thleng nawn tawh lo se, tih state sawrkar kan ngen a ni,’ a ti.