Youth Icon boruak a sang tan ta

He thu i chhiar hi chuan Top 8 result i hre leh hman tawh ang. LPS Youth Icon boruakin a vawrtawp a thleng tan a, top 10 live performance-in ngaihven a hlawh ta hle a, top 10-a hmeichhe lang awmchhun Lalremsiami, Darlawn Venghlun chu a tla hmasa berah tangin, Nilaini zanah result puan a ni a, Nilaini zanah Top 9 intihsiak lehnghalin, nizan khan Top 8 result an puang leh tawh ang. Tihian zantin pakhat an tla zel tawh dawn a ni.
Intihsiak laiin judge ten an live performance hi headphone nen a hmunah uluk takin an ngaithla a, live show zawh hnuah an ngaithla nawn leh vek a, chuta tang chuan result buatsaih thin a ni. Mipui vote a tel lo va, judge thutlukna zel a ni a, judge pathum awmin, a tam zawk thutlukna ang zelin an kal niin thu kan dawng.
Intihsiaknaah hian zantin pakhat zel tla tawh tur an nih rualin, judge te hian a tla tur ngei ngei pawh pakhat theuh chhanhim theihna an nei a, hei hi top 5 hmain an hmang thei a, top 5 chinah chuan a hman theih tawh dawn loh thung a ni.
Intihsiaknaa tum khat che fuh lo deuh, tla mai tur awm ta se la, judge zinga tu emaw berin a kal leh zelna turah beiseina neih puiin, chetha leh thei tura beisei te an nei thei a, chutianga an mi duhzawng chu vawi khat theuh chhanhim theihna an nei a, hetah hi chuan judge te an inlungrual kher pawh a ngai lo va, an zinga pakhatin a duh chuan a ‘save’ mai thei dawn a ni. Mahse, judge-in a tla tur an ‘save’ chuan a zanlehah pakhat tlalovin pahnih an tla tawh thung dawn a ni.