STA rate ang loa tlan hi mipui rawkna – MCU

Man chawia mipui phurtu lirthei hoin State Transport Authority man bithliah zawm loa rate hran an siam thin chu dik lo taka mipui sum rawkna a ni tih Mizoram Consumer’s Union chuan an sawi.
Mizoram Consumer’s Union (MCU) thuchhuak chuan, tunhnai chauh ni lo, tunhma atangin man chawia mipui phurtu lirtheiten sawrkarin chuan man a bithliah zawm duh loin an pawlin chuan man an siam angin an tlan thin chu dan pawisak lohna, mipui rawkna a ni tih sawiin, STA rate siam anga tlan tha duh lote laka dan anga action lak mumal a awm thin loh avangin lirtheia sumdawngte an pawngpawrh zel thin tih a sawi.
‘Danin mipui dinhmun harsatna hrethiama sawrkarin lirthei chuan man a bithliah ang zawm hram hram turin kan ngen a; sawrkar pawh mipui tana ding an nih angin dan bawhchhetute lakah dan anga action la ngam turin kan ngen a ni,’ a ti.
STA-in kumin March-a thuchhuah a siam anga man chawia mipui phur lirthei service – taxi, autorickshaw leh maxi cab chuan man bithliah tharah two wheeler taxi chu km.1-ah Rs.30, km khat hnuah km tinah Rs.20 zel; taxi pangngaiah km.1-ah Rs.55, km dang zelah Rs.45 zel; autorickshaw chuan man chu km.1-ah Rs.35, a hnu km tinah Rs.25 zel tura ruahman a ni tih sawiin, maxi cab chu metal road-a a tlanin km.1-ah Rs.3.50 leh metal road loah Rs.4 a ni dawn tih MCU hian a sawi a ni.